बुलडाणा जिल्ह्यात पीक कर्जमाफीची कार्यवाही सुरू

बुलडाणा  :  छत्रपती शिवाजी महाराज शेतकरी सन्मान योजनेअंतर्गत व्यापारी, ग्रामीण, खाजगी व सहकारी बँकांकडील पीक कर्जास विहित निकषानुसार माफी देण्याची कार्यवाही सुरू आहे. ज्या खातेदारांना कर्जमाफी योजनेतंर्गत लाभ मिळालेला आहे, अशा लाभार्थ्यांनी बँकेशी संपर्क करून त्यांना मिळालेल्या लाभाबाबत खातरजमा करून घ्यावी, असे आवाहन जिल्हा उपनिबंधक नानासाहेब चव्हाण यांनी केले आहे.

मुख्यमंत्री देवेंद्र फडणवीस यांच्या अध्यक्षतेखालील राज्यस्तरीय बॅंकर्स समितीच्या शिफारशीनुसार राज्यातील व्यापारी बॅकांकडून पीककर्ज घेतलेल्या व कर्ज खाते एनपीए अर्थात अनुत्पादक जिंदगी म्हणून वर्गीकृत करण्यात आलेल्या खातेदारांना शासनाच्या छत्रपती शिवाजी महाराज शेतकरी सन्मान योजनेअंतर्गत लाभ देण्याकरिता शासन व बँकांच्या परस्पर समझोत्यानुसार एकरकमी परतफेड योजना राबविण्यात येत आहे.

या योजनेच्या निकषानुसार सहकार खात्याकडून पात्र ठरविण्यात आलेल्या पीक कर्ज खात्यांनाच ही योजना लागू होणार आहे. प्रत्येक अनुत्पादक खात्याच्या थकीत शिल्लक मुद्दलनुसार त्यांची वर्गवारी करण्यात आली आहे. त्यानुसार खात्यावरील थकीत शिल्लक अर्थात मुद्दलनुसार एकरकमी परतफेडीची पात्र रक्कम असणार आहे.

बँकेस किमान अपेक्षित वसुलीबाबतचे प्रमाण निश्चित करण्यात आलेले आहे. त्याप्रमाणे ३१ जुलै २०१७  च्या स्थितीवरील एनपीए कर्ज थकीत शिल्लकेच्या ८५ टक्के असणार आहे. तसेच ३१ मार्च २०१६ च्या स्थितीवरील एनपीए कर्ज थकीत शिलकेच्या ७० टक्के, त्यापुढे ३१ मार्च २०१५ च्या स्थितीवरील एनपीए कर्ज थकीत शिलकेच्या ५५ टक्के, ३१ मार्च २०१४ च्या स्थितीवरील एनपीए कर्ज थकीत शिलकेच्या ४५ टक्के आणि ३१ मार्च २०१३ च्या स्थितीवरील एनपीए कर्ज थकीत शिलकेच्या ३५ टक्के पात्र असणार आहे.