फ्लॉवर रोपांना कंदच आले नाही; शेतकऱ्यांचे मोठे नुकसान

नाशिक : ‘‘नाशिक शहराजवळील विविध गावांमध्ये भाजीपाल्याचे उत्पादन मोठ्या प्रमाणावर घेण्यात येते. त्यात पळसे हे गावदेखील आघाडीवर आहे. भाजीपाला रोपवाटिकेतून तयार झालेली लागवडीयोग्य रोपे खरेदी करतात. एका रोपवाटिकेतून फ्लॉवरची रोपे खरेदी करून अर्धा एकर लागवड केली. मात्र, ३ महिने लागवडीनंतर कंद तयार न झाल्याने लागवडीसाठी केलेला ५० हजारांचा खर्च वाया गेल्याची,’’ माहिती विलास गायधनी यांनी दिली.  याबाबत सविस्तर माहिती अशी की, येथील भाजीपाला उत्पादक शेतकरी रुंजा गायधनी यांनी गावातील रोपवाटिकेतून अर्धा एकर क्षेत्रावर लागवड करण्यासाठी सात हजार रोपांची प्रतिरोप ७० पैसे दराने रोपांची खरेदी केली. त्याची लागवड ३ ऑक्टोबरला करण्यात आली होती. लागवडीनंतर वेळोवेळी खत पुरवठा, औषध फवारणी करण्यात आली. रोपांची डेरेदार वाढ झाली. मात्र, तीन महिने कालावधी उलटून गेल्यानंतरही बनावट रोपांमुळे कंदाची निर्मिती न झाल्याने उत्पादन आलेच नाही. त्यामुळे लागवडीपासून त्यांनी केलेला खर्च वाया गेला आहे. गायधनी यांच्याकडे भांडवल नसल्यामुळे हात उसनवारी व काही निविष्ठा उधारीवर खरेदी केल्या होत्या. पिकासाठी दुसऱ्याकडून पाणी घेतले. मात्र, आता उत्पादन न आल्याने ते अडचणीत सापडले. त्यांनी कंद तयार न झाल्याबाबत खरेदी केलेल्या रोपवाटिकेच्या संचालकांना माहिती दिली. त्यावर संबंधित बियाणे कंपनीचे पाहणी करतील, असे सांगण्यात आले. मात्र, चार दिवस उलटून कुणीही पाहणी केली नाही. तसेच दखल घेतलेली नाही. त्यामुळे नुकसान भरपाई व मजुरी खर्च मिळावा, ही मागणी श्री. गायधनी यांनी केली आहे.  

फ्लॉवरला कंद येण्याची तीन महिने वाट बघितली पण आमची फसवणूक झाली आहे. ५० हजार रुपये लागवड खर्च आला आहे. अजून, खतांचे पैसे आणि पाणीपुरवठा आम्ही दुसऱ्या शेतकऱ्यांकडून घेतले होते. तेही पैसे देणे बाकी आहे, तरी कंपनीवर कारवाई करावी, आम्हांला संपूर्ण भरपाई मिळावी. अन्यथा आत्महत्या करण्याशिवाय पर्याय नाही.’’ - विकास गायधनी, शेतकरी, पळसे, नाशिक