नांदेड जिल्ह्यातील सोयाबीनची उत्पादकता हेक्टरी तेरा क्विंटल ६२ किलो

नांदेड : मागील खरीप हंगाम २०२०-२१ मधील जिल्ह्यातील सोयाबीनची सरासरी उत्पादकता १३ क्विंटल ६२ किलो आली आहे. जिल्ह्यात पीक कापणी प्रयोगाच्या ९५२ संकलनावरून उत्पादकता जाहीर करण्यात आली. यात सर्वाधिक उत्पन्न उमरी तालुक्यात २२ क्विंटल ९६ किलो तर सर्वात कमी भोकर तालुक्याचे पाच क्विंटल ७९ किलो आल्याची माहिती कृषी विभागाकडून मिळाली.

जिल्ह्यात पिकाचे सरासरी उत्पादकता जाहीर करण्यासाठी संबंधित पिकाच्या पीक कापणी प्रयोगातून स्पष्ट होते. यंदा जिल्ह्यातील सोळा तालुक्यात सोयाबीनच्या ९६० पीक कापणी प्रयोगाचे नियोजन करण्यात आले होते. यातील प्राप्त झालेल्या ९५२ संकलनातून तालुकानिहाय सोयाबीनचे उत्पादन निश्चित करण्यात आली आहे.

कृषी विभाग, महसूल तसेच जिल्हा परिषद या तीन यंत्रणांच्या माध्यमातून पीक कापणी प्रयोग हाती घेण्यात येतो. दहा बाय पाच मीटर आकाराचा प्लॉट निश्चित करून त्यातून उत्पादकता काढली जाते. एकूण प्रयोगाच्या सरासरी उत्पादकतेवर तालुक्याची उत्पादकता निश्चित करून तालुक्याच्या सरासरी उत्पादकता निश्‍चित केली जाते. तर तालुक्याच्या उत्पादकतेवर जिल्ह्याची सरासरी उत्पादकता कृषी विभागाच्या सांख्यिकी विभागाकडून निश्चित केली जाते.

पीक कापणी प्रयोगातून प्राप्त झालेल्या ९५२ संकलन नोंदीवरून जिल्ह्याची सरासरी सोयाबीनची उत्पादकता १३ क्विंटल ६२ किलो आली आहे. यात सर्वाधिक उमरी तालुक्याची २२ क्विंटल ९६ किलो तर सर्वात कमी पाच क्विंटल ७९ क्विंटल भोकर तालुक्याची आली आहे.

तालुकानिहाय उत्पादकता (हेक्टरमध्ये)

नांदेड १२ क्विंटल १० किलो, अर्धापूर १३ क्विंटल ८३ किलो, मुदखेड १४ क्विंटल २८ किलो, कंधार १४ क्विंटल ३५ किलो, लोहा १३ क्विंटल १५ किलो, बिलोली ११ क्विंटल २४ किलो, देगलूर १५ क्विंटल ४८ किलो, धर्माबाद १६ क्विंटल ८१ किलो, नायगाव ९ क्विंटल ६२ किलो, मुखेड ११ क्विंटल ७५ किलो, माहूर १५ क्विंटल ५१ किलो, हिमायतनगर १५ क्विंटल ९४ किलो, किनवट १६ क्विंटल १२ किलो, हदगाव १३ क्विंटल ९७ किलो, भोकर ५ क्विंटल ७९ किलो, उमरी २२ क्विंटल ९६ किलो.