तत्कालीन प्रकल्प अधिकारी ‘केम’ गैरव्यवहारप्रकरणी निलंबित

मुंबई : विदर्भातील सहा जिल्ह्यांतील कृषी समृद्धी समन्वयित प्रकल्पात (केम) झालेल्या गैरव्यवहारप्रकरणी तत्कालीन प्रकल्प अधिकारी गणेश चौधरी यांना निलंबित केल्याची घोषणा पणनमंत्री राम शिंदे यांनी बुधवारी (ता. १९) विधानसभेत केली.  

विदर्भातील अमरावती, अकोला, यवतमाळ, बुलडाणा, वाशीम आणि वर्धा या जिल्ह्यांतील शेतकऱ्यांच्या विकासासाठी विविध योजना व प्रत्यक्ष लाभ स्वरूपात या कृषी समृद्धी समन्वयित प्रकल्प (केम) राबविण्यात येत आहे. या प्रकल्पावर १०८ कोटी खर्च झाले. या आत्महत्याग्रस्त सात जिल्ह्यांत राबविण्यात आलेल्या या प्रकल्पाच्या विविध कामांत गैरव्यवहार झाल्याचे आढळून आले होते. या प्रकल्पात सुमारे दहा कोटी रुपयांचा गैरव्यवहार झाल्याचा आरोप आहे. या प्रकरणाची लाचलुचपत प्रतिबंधक विभागामार्फत चौकशी सुरू करण्यात आली आहे. 

या चौकशीत काय आढळून आले आहे आणि चौकशीच्या अनुषंगाने संबंधित अधिकाऱ्यावर काय कारवाई केली, असा प्रश्न सदस्यांनी उपस्थित केला होता. 

त्यानंतर केमचे तत्कालीन प्रकल्प अधिकारी गणेश चौधरी यांचे निलंबन केल्याची घोषणा मंत्री शिंदे यांनी केली. तसेच केम प्रकल्पात २०१६-१७ मध्ये प्रकल्पातील कामांमध्ये वित्तीय अनियमितता झाली आहे. संपूर्ण प्रकल्पात सहभागी असलेल्या शासकीय अधिकारी, प्रकल्पाच्या अंमलबजावणीसाठी कंत्राटी पद्धतीने नेमण्यात आलेल्या व्यक्ती, संस्था व खासगी व्यक्ती यांची लाचलुचपत प्रतिबंधक विभाग अमरावती परिक्षेत्राचे पोलिस अधीक्षक यांच्यामार्फत उघड चौकशी सुरू करण्यात आल्याचेही त्यांनी सांगितले.