रब्बी पीकविमा योजनेसाठी प्रस्ताव

पंतप्रधान पीक विमा योजनेअंतर्गत परभणी जिल्ह्यातील रब्बी ज्वारी, गहू (बागायत), हरभरा, उन्हाळी भुईमूग या पिकांसाठी शेतकऱ्यांना विमा संरक्षण घेता येईल. रब्बी ज्वारीसाठी सोमवारपर्यंत (ता. ३०) विमा प्रस्ताव दाखल करता येतील.
Proposal for Rabbi Crop Insurance Scheme रब्बी पिकांसाठी विमा योजना
Proposal for Rabbi Crop Insurance Scheme रब्बी पिकांसाठी विमा योजना

परभणी :  पंतप्रधान पीक विमा योजनेअंतर्गत परभणी जिल्ह्यातील रब्बी ज्वारी, गहू (बागायत), हरभरा, उन्हाळी भुईमूग या पिकांसाठी शेतकऱ्यांना विमा संरक्षण घेता येईल. कर्जदार तसेच बिगर कर्जदार शेतकऱ्यांना रब्बी ज्वारीसाठी सोमवारपर्यंत (ता. ३०) विमा प्रस्ताव दाखल करता येतील. गहू आणि हरभऱ्यासाठी १५ डिसेंबरपर्यंत तर उन्हाळी भुईमुगासाठी ३१ मार्च २०२१पर्यंत विमा प्रस्ताव सादर करता येतील. जिल्ह्यातील जास्ती जास्त शेतकऱ्यांनी रब्बी पीकविमा योजनेत सहभागी व्हावे, असे आवाहन जिल्हाधिकारी दीपक मुगळीकर यांनी केले आहे.

रब्बी हंगामात अन्नधान्य आणि गळितधान्य पिकांसाठी विमा हप्ता दर १.५० टक्के तर नगदी पिकांसाठी पाच टक्के आहे. अधिसूचित क्षेत्रातील अधिसूचित पिकांचे उंबरठा उत्पादन हे सर्व पिकांसाठी त्या हंगामातील मागील सात वर्षांपैकी सर्वाधिक उत्पादनाच्या पाच वर्षांचे उत्पादन गुणिले त्या पिकांचा जोखीम स्तर असेल. उंबरठा उत्पादन संपूर्ण 3 वर्षे कालावधीकरिता स्थिर असेल. या योजनेअंतर्गत २०२२-२३ पर्यंत जोखीम स्तर सर्व अधिसूचित पिकांसाठी ७० टक्के निश्चित करण्यात आला आहे. पीक पेरणीपासून ते काढणी पर्यंतच्या कालावधीत नैसर्गिक आग, वीज कोसळणे, गारपीट, वादळ, चक्रीवादळ, पूर, क्षेत्र जलमय होणे, भुस्खलन, दुष्काळ, पावसाचा खंड, कीड, रोग या टाळता न येणाऱ्या जोखमीमुळे पिकांच्या उत्पादनात येणाऱ्या घटीपासून व्यापक विमा संरक्षण मिळणार आहे. 

जिल्ह्यासाठी रिलायन्स जनरल इंन्सूरन्स कंपनी लि. मार्फत ही योजना राबविण्यात येत आहे. विमा प्रस्ताव दाखल करण्यासाठी बँकांमध्ये होणारी गर्दी टाळता यावी तसेच या प्रक्रियेत सुलभता यावी यासाठी शेतकऱ्यांनी विमा प्रस्ताव आणि हप्ता जनसुविधा केंद्र (सामाईक सुविधा केंद्र-सीएससी) मार्फत ऑनलाइन पद्धतीने निःशुल्क भरावा. जिल्हा मध्यवर्ती सहकारी बॅंक, राष्ट्रीयकृत बॅंका या ठिकाणी सुद्धा विमा प्रस्ताव सादर करता येतील.

विमा प्रस्तावासोबत, आधारकार्ड, सातबारा उतारा, अधिसूचित पिकांचे पेरणी स्वयंघोषणापत्र, करारनामा, बँक पासबुकाची प्रत, भाडे पट्टा करार असलेल्या शेतकऱ्यांचा करारनामा, संमतिपत्र कागदपत्रे जोडणे आवश्यक आहेत. कर्जदार शेतकरी या योजनेत सहभागी व्हायचे किंवा नाही या बाबत निर्णय घेऊ शकतात. या योजनेत सहभागी होऊ न इच्छिणाऱ्या कर्जदार शेतकऱ्यांनी त्या बाबतचे घोषणापत्र अंतिम मुदतीच्या ७ दिवस आधी देणे अपेक्षित आहे. मुदतीत घोषणापत्र प्राप्त झाल्यास कर्जदार शेतकऱ्यांना या योजनेतून वगळण्यात येईल.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com