नगरला निदर्शने, अकोलेत विधेयकांची होळी

नगर : केंद्र सरकारने मंजूर केलेल्या तीन शेतकरी विधेयकांना कडाडून विरोध करून शुक्रवारी (ता.२५) नगर येथे निदर्शने करण्यात आली. अकोले येथे विविध संघटनांनी विधेयकांच्या प्रतीची होळी करून मोदी सरकारच्या भूमिकेचा निषेध करण्यात आला. सरकार शेतकरी, कामगारांच्या भावनांशी खेळत आहे. त्याची किंमत त्यांना मोजावी लागेल, असा इशारा किसान सभेचे सरचीटणीस डॉ. अजित नवले यांनी दिला. 

‘‘केंद्र सरकारने मंजूर केलेली विधेयके ही शेतकरी विरोधी आहेत. त्याला विरोध करण्यासाठी अखिल भारतीय किसान संघर्ष समन्वय समितीने बंद पुकारला होता. नगर येथे डॉ. बाबासाहेब आंबेडकर यांच्या पुतळ्याला अभिवादन करुन निदर्शने करण्यात आली. ‘रास्ता रोको’ करण्याचा प्रयत्न करणाऱ्या कार्यकत्यांना पोलिसांनी ताब्यात घेतले. भारतीय कम्युनिष्ट पक्षाचे नेते अॅड. सुभाष लांडे, बन्सी सातपुते, भारती न्यालपेल्ली, बहिरनाथ वाकळे, अंबादास दौंड, तुषार सोनवणे, चंद्रकांत माळी, संतोष गायकवाड, दिपक सिरसाठ, सतिश निमसे, कार्तिक पासलकर, सतीश पवार, विजय केदारे आदीसह कार्यकर्ते सहभागी झाले होते. 

अकोले येथे अखिल भारतीय किसान सभा (माकप व भाकप), राष्ट्रवादी कॉंग्रेस, शिवसेना, छात्रभारती, युवा स्वाभिमान, स्वाभिमानी शेतकरी संघटनेच्या कार्यकर्त्यांनी तहसिल कार्यालयावर मोर्चा काढून निदर्शेने केली. विधेयकांचीही होळी केली. शहरात मानवी साखळी करून विधेयकांचा निषेध करण्यात आला. 

डॉ. नवले, आमदार किरण लहामटे, हेरंब कुलकर्णी, विनय सावंत, शांताराम वाळुंज, कारभारी उगले, सदाशीव साबळे, नामदेव भांगरे, महेश नवले, सुरेश नवले, संपत नाईकवाडी, एकनाथ मेंगाळ, साहेबराव घोडे, चंद्रकांत नेहे, मच्छिंद्र धुमाळ, विनय धांडे आदी कार्यकर्ते सहभागी झाले होते. सरकार शेतकरी, कष्टकरी कामगार यांच्या विरोधी निर्णय घेत भावनांशी खेळत आहे. सरकारने जनविरोधी भूमिका घेतली, तर त्याची किंमत मोजावी लागेल, असा इशारा नवले यांनी यावेळी दिला.