पूरग्रस्तांना तत्काळ मदत द्या :पालकमंत्री देशमुख

सोलापूर  : ‘‘जिल्ह्यातील पूरग्रस्तांना तत्काळ आर्थिक मदत द्या,’’ अशा सूचना पालकमंत्री विजय देशमुख यांनी गुरुवारी (ता. १५) येथे दिल्या.

स्वातंत्र्य दिनाच्या ध्वजारोहण कार्यक्रमानंतर जिल्हाधिकारी कार्यालयात जिल्ह्यातील पूरस्थितीचा आढावा घेण्याबाबत देशमुख यांच्या अध्यक्षतेखाली बैठक झाली. जिल्हाधिकारी डॉ. राजेंद्र भोसले, पोलिस आयुक्त अंकुश शिंदे, महापालिका आयुक्त दीपक तावरे, पोलीस अधीक्षक मनोज पाटील, जिल्हा परिषदेचे मुख्य कार्यकारी अधिकारी प्रकाश वायचळ, अतिरिक्त पोलिस उपायुक्त विजय मगर, अधीक्षक अभियंता संतोष शेलार, अधीक्षक अभियंता धीरज साळे आदी उपस्थित होते.

देशमुख म्हणाले, ‘‘पंढरपूर आणि माळशिरस तालुक्यात पुराचा फटका बसला आहे. या तालुक्यासह इतर तालुक्यातील पूरग्रस्तांना रोख मदतीचे वाटप करा. शेतीचे, घराच्या नुकसानीचे पंचनामे करून मदतीसाठी शासनाकडे अहवाल पाठवावा.’’

दरम्यान, हिप्परगा तलावात पाणी सोडण्याबाबतही चर्चा झाली. ‘‘महापालिकेने हिप्परगा तलावात पाणी सोडण्यासाठी पंप बसवले आहेत. पण जलसंपदा विभागाकडून पाणी कालव्यात पाणी सोडले जात नसल्यामुळे हिप्परगा तलावात पाणी सोडता येत नाही,’’ असे तावरे यांनी सांगितले. यावर कालव्यात पाणी सोडण्याबाबत जलसंपदा विभागाने आवश्यक कार्यवाही करावी, अशा सूचना देशमुख यांनी साळे यांना दिल्या.

निवासी उपजिल्हाधिकारी अजित देशमुख, नगररचना सहाय्यक संचालाक प्रभाकर नाळे, तहसिलदार श्रीकांत पाटील आदी उपस्थित होते.

पंढरपुरातील पूरग्रस्त कुटुंबांच्या खात्यावर मदत जमा

पूरस्थितीमुळे झालेल्या नुकसानीसाठी पंढरपूर  तालुक्यातील ९७५ कुटुंबांच्या बँक खात्यांवर प्रत्येकी १० हजार रुपयांप्रमाणे ९७ लाख ५० हजार रुपये जमा करण्यात आले, अशी माहिती तहसीलदार मधुसूदन बर्गे यांनी दिली. या पुरामुळे नदी काठावरील ४३ गावांत व पंढरपूर शहरात पूरस्थिती निर्माण झाली. पूरस्थितीमुळे बाधित झालेल्या नागरिकांना घरातील भांडी, कपडे, घरगुती वस्तूच्या नुकसानीकरिता शासनाच्या वतीने मदत देण्यात येत आहे.

पूरस्थितीमुळे तालुक्यात एकूण ४ हजार ७९० कुटुंब बाधित झाली. आतापर्यंत ३ हजार ६५४  कुटूंबांचे पंचनामे झाले असून, त्यापैकी ९७५ बाधितग्रस्त कुटुंबांच्या बँक खात्यावरती ९७ लाख ५० हजार रुपये जमा करण्यात आले. तसेच त्यांना  २८६.७ क्विंटल गहू व २८६.७ तांदूळ पुरविण्यात आले. तालुक्यातील पात्र पूरबाधितग्रस्त प्रत्येक कुटुंबांला शासनाच्या वतीने मदत देण्यात येणार आहे. ही मदत थेट बाधितग्रस्तांच्या बँक खात्यावर जमा करण्यात येईल, असेही बर्गे यांनी सांगितले.