‘भंडारदरा’ तांत्रिकदृष्ट्या भरल्याचे जाहीर

नगर : नगर जिल्ह्यामध्ये उत्तरेतील तालुक्‍यासाठी महत्त्वाच्या असलेल्या भंडारदरा धरण (रविवारी) दुपारी एक वाजता तांत्रिकदृष्ट्या भरल्याचे जलसंपदा विभागाने जाहीर केले. आज (सोमवारी) सकाळी सहा वाजता धरणात १० हजार ७४९ दशलक्ष घनफूट पाणीसाठा होता. काल (रविवार) घाटघर व रतनवाडी परिसरात मुसळधार पाऊस सुरू झाल्याने धरणात वेगाने पाण्याची आवक होत आहे. त्यामुळे जलाशयातून अम्ब्रेला फॉल, व्हॉल्व्हमधून ८१९ क्‍यूसेकने पाणी सोडले जात आहे.

नगर जिल्ह्याच्या उत्तर भागासाठी भंडारदरा धरण महत्त्वाचे आहे. दरवर्षी हे धरण स्वातंत्र्य दिनाआधीच भरते. यंदाही ते दोन दिवस आधीच भरल्याचे जलसंपदा विभागाने जाहीर केले. सध्या या भागात पर्यटकांची आज मोठी गर्दी होत आहे. अकोल्याच्या पश्‍चिम भागात गेल्या काही दिवसांपासून पाऊस बंद होता. मात्र भंडारदरा, मुळा पाणलोट क्षेत्रात आठ दिवसांच्या विश्रांतीनंतर कालपासून (शनिवार) पावसाचे जोरदार पुनरागमन झाले.

घाटघर, रतनवाडी, पांजरे साम्रट या भागात पावसाच्या जोरदार सरी कोसळत आहेत. भंडारदरा धरण तसे गेल्या वीस दिवसांपूर्वीच भरलेले आहे. मात्र ऑगस्टमध्ये भरल्याचे तांत्रिकदृष्ट्या जाहीर केले जाते. त्यानुसार काल (रविवारी) दुपारी जलसंपदा विभागाने धरण भरल्याचे जाहीर केले आणि `जलसंपदा''च्या कर्मचाऱ्यांनी जल्लोष करीत जलाशयात साडी-चोळी, श्रीफळ अर्पण करून पूजन केले.

भंडारदरा भरल्यामुळे आता निळवंडे, मुळामध्ये पाण्याची आवक होत आहे. निळवंडे धरणही भरण्याच्या मार्गावर असून सध्या धरणात ७८. ७१ टक्के पाणीसाठा झाला आहे. निळवंडेतून सध्या १५५० क्‍युसेकने पाण्याचा खरिपासाठी विसर्ग सुरू आहे. २६ टीएमसी क्षमतेच्या मुळा धरणात सोळा टीएमसी पाणीसाठा झाला आहे.