पुणे बाजार समिती सोमवारी सुरू; शहरात मुबलक भाजीपाला उपलब्ध राहणार : प्रशासक

पुणे (प्रतिनिधी) : कोरोना विषाणूच्या फैलावाच्या पार्श्‍वभूमीवर गेली दोन दिवस बंद असलेली बाजार समिती सोमवारी (ता. २३) सुरळीत सुरू राहणार असून, गर्दी टाळण्यासाठी विविध उपयायोजना करण्यात आल्याची माहिती प्रशासक बी. जे. देशमुख यांनी दिली. याबाबत देशमुख यांनी बाजार आवारातील सर्व संघटना पदाधिकाऱ्यांची बैठक शनिवारी (ता. २१) घेतली.

दरम्यान, शहरात सर्वत्र भाजीपाला उपलब्ध होण्यसाठी बाजार समिती प्रशासन आणि बाजार घटक प्रयत्नशील असून, बाजार समितीमधील गर्दी टाळण्यासाठी किरकोळ आणि घरगुती खरेदीदारांनी सोमवारी (ता. २३) बाजार समितीमध्ये फळे भाजीपाला खरेदीसाठी येऊ नये, असे आवाहनदेखील देशमुख यांनी केले आहे.

याबाबत बोलताना देशमुख म्हणाले, ‘‘गेल्या तीन दिवसांपासून शहरात भाजीपाल्याची टंचाई जाणवू लागल्याने, शहरात मुबलक भाजीपाला उपलब्ध करण्याच्या उपाययोजना सर्व बाजार घटक करत आहे. यासाठी सोमवारी (ता.२३) पहाटे ३ ते सकाळी ८ वाजेपर्यंत भाजीपाला विभाग, ८ ते १० फळे आणि १० ते १२ वाजेपर्यंत कांदा बटाटा विभाग सुरू ठेवण्यात येणार आहे, तर किरकोळ बाजार बंद ठेवण्यात येणार आहे. या दरम्यान बाजार आवारात घरगुती ग्राहक आणि किरकोळ ग्राहकांची गर्दी टाळण्यासाठी त्यांना प्रवेश देण्यात येणार नाही. किरकोळ व्यापाऱ्यांद्वारे शहरात आणि उपनगरांमध्ये मुबलक भाजीपाला उपलब्ध करण्यासाठी त्यांना खरेदीसाठी प्रवेश देण्यात येणार आहे.’’