पुणे जिल्ह्यात नुकसानीचे पंचनामे धीम्या गतीने

पुणे ः निवडणुकीच्या रणधुमाळीमुळे पुणे जिल्ह्यातील बारामती, पुरंदर, हवेली, भोर तालुक्यांतील अनेक भागांत अजूनही पंचनामे सुरू झालेले नाहीत. कृषी सहायक, ग्रामसेवक, तलाठ्यांची गावात नसलेली उपस्थिती यामुळे अनेक भागांत पंचनामे धीम्या गतीने सुरू आहेत. शेतकऱ्यांना पंचनाम्यासाठी कृषी सहायकांवर अवलंबून राहावे लागत आहे. त्यामुळे शेतकऱ्यांना मोठा फटका बसत असून, वेळेवर पंचनामे न झाल्यास अनेक शेतकऱ्यांना नुकसान भरपाईपासून वंचित राहावे लागण्याची शक्यता आहे.  

अतिपावसामुळे पिकांचे नुकसान होऊन महिना होत आला आहे. या नुकसानीचे पंचनामे करून त्याचा अहवाल तातडीने सादर करण्याच्या सूचना जिल्हाधिकाऱ्यांनी दिले होते. मात्र, निवडणुकीमुळे कृषी सहायक, ग्रामसेवक आणि तलाठ्याची नसलेली उपस्थिती यामुळे अखेर पंचनाम्यासाठी अडचणी येत आहेत. त्यामुळे अनेक कृषी सहायक पंचनाम्यासाठी फिरत असले तरी, त्याची संख्या पाहता पंचनाम्यासाठी वेळ लागत आहे. अनेक भागात अजूनही पंचनामे सुरू झालेले नाही. काही भागांत पंचनामे सुरू झाले असले तरी, गती पाहता अत्यंत धीम्या गतीने पंचनामे सुरू असल्याचे दिसून येते. त्यामुळे वेळेत पंचनामे सुरू होऊन नुकसानभरपाई मिळेल की नाही अशी साशंकता शेतकऱ्यांना आहे.

मुसळधार पावसामुळे पुरंदर तालुक्यातील भातखाचरांत अतिपाणी झाल्याने अनेक ठिकाणी बांध फुटले. त्यामुळे भाताचे अनेक भागांत नुकसान झाले. बारामती, हवेली, भोर, वेल्हा या तालुक्यांतही अतिपावसामुळे अनेकांची पिके पाण्याखाली गेली. यामुळे बाजरी, मूग, वाटाणा, उडीद, सोयाबीन या पिकांचे मोठे नुकसान झाले. काही ठिकाणी घरांचीही पडझड झाली. 

जिल्ह्यात कोरडवाहू आणि बागायती असे एकूण दोन लाख ९३ हजार २१६ हेक्टर क्षेत्र आहे. अतिपावसामुळे सुमारे तीन हजार १७७ हेक्टरवरील पिकांचे नुकसान झाले असल्याची माहिती कृषी विभागाने घेतलेल्या नजरअंदाजाच्या अहवालावरून माहिती पुढे आली आहे. त्यानुसार जिल्हाधिकारी यांनी तहसीलदारामार्फत पंचनामे करून तत्काळ अहवाल सादर करण्याच्या सूचना दिल्या होत्या. परंतु पुरंदर, बारामती, हवेली भोर आणि वेल्हा तालुक्यांच्या अनेक भागांत अजूनही पंचनामे सुरू झालेले नाहीत. त्यामुळे हे पंचनामे केव्हा होतील, असा प्रश्न शेतकऱ्यांमाधून विचारण्यात येत आहे.