पुणे जिल्ह्यात पावसाची रिमझिम

पुणे : जिल्ह्याच्या पश्‍चिम भागातील तालुक्यांमध्ये पावसाची रिमझिम सुरू आहे. जिल्ह्याच्या पश्‍चिम भागात पावसाचा जोर अधिक आहे. या भागातील धरणांच्या पाणलोट क्षेत्रात होणाऱ्या पावसामुळे धरणांतील पाण्याचा विसर्ग सुरूच आहे. तर पूर्व भागातील कोरडवाहू पट्ट्यात मात्र पावसाची उघडीप कायम अाहे.

जिल्ह्यातील मावळ, मुळशी, भोर, वेल्हा, जुन्नर, खेड, हवेली, आंबेगाव तालुक्यांमध्ये श्रावण सरी कोसळत असून, अनेक भागांत जोरदार पाऊस पडत आहे. मात्र शिरूर, बारामती, इंदापूर, दौंड, पुरंदर तालुक्यांत अनेक भागांत पावसाची उघडीप असून, दिवसभरात पावसाच्या तुरळक सरींची नोंद होत आहे.

रविवारी सकाळपर्यंतच्या २४ तासांमध्ये मुळशीतील मुठे येथे ७४ मिलिमीटर, तर मावळातील लोणावळ्यात ७१ मिलिमीटर पावसाची नोंद झाल्याचे कृषी विभागातर्फे सांगण्यात आले. रविवारी (ता. २६) सकाळपर्यंतच्या २४ तासांमध्ये पडलेला पाऊस (मिलिमीटरमध्ये) : पौड ४१, घोटावडे ४४, माले ५६, मुठे ७४, पिरंगूट ३९, भोर २०, भोलावडे २०, नसरापूर २७, आंबवडे २१, निगुडघर ५५, वडगाव मावळ २०, खडकाळा ५१, लोणावळा ७१, शिवणे ३५, वेल्हा ३१, पानशेत ३५, विंझर २०, अंभवणे २२, राजूर ३२, वाडा २४, कुडे २२, पाईट २०.

खडकवासला, वीर धरणातून विसर्ग जिल्ह्यातील धरणांना पाणीपुरवठा करणाऱ्या नद्या, नाले, ओढ्यामधून पाण्याची आवक सुरूच असल्याने पाणीसाठ्यामध्ये वाढ होतच आहे. जिल्ह्यातील बहुतांशी धरणे ओव्हर फ्लो झाली असून, त्यातून विसर्ग सुरू आहे. नीरा खाऱ्यातील भाटघर (४५७८ क्युसेक), नीरा देवघर (५०१०), गुंजवणी (१०००) धरणातून सोडण्यात आलेल्या पाण्यामुळे वीर धरणातून सुमारे साडे १३ हजार क्युसेकहून अधिक विसर्ग सुरू आहे. तर वरसगाव (२०४३), पानशेत (३५५१), टेमधरमधून (७७८) सोडण्यात अालेल्या पाण्याची आवक वाढल्याने खडकवासला धरणातून दुपारी विसर्ग वाढवून मुठा नदी पात्रात १४ हजार क्युसेक वेगाने पाणी साेडले. मुळशीतून सहा हजार, डिंभे, घोड, चासकमान धरणांतून ही पाण्याचा विसर्ग सुरू आहे.