खानदेशात धान्याची शिवार खरेदी, मार्केट बंदच

जळगाव : खानदेशात धान्याची शिवार खरेदी बंद आहे. धुळे, जळगाव व इतर प्रमुख बाजार समित्यांमधील धान्य मार्केटयार्डही अडतदारांच्या नकारघंटेमुळे बंद आहेत. यामुळे धान्य घरीच साठविण्याची वेळ शेतकऱ्यांवर आली आहे. 

सध्या गहू, ज्वारी, दादरची मळणी वेगात सुरू आहे. गव्हाची ५० ते ६० टक्के क्षेत्रातील मळणी पूर्ण झाली आहे. तर, दादरची, हरभऱ्याची मळणीदेखील पूर्ण झाली आहे. परंतु, मार्केटयार्ड बंद असल्याने, लिलाव होत नसल्याने धान्याची विक्री बंद आहे. धुळे बाजार समितीने शेतकऱ्यांनी कुठलेही धान्य विक्रीसाठी आणू नये, असे आवाहन केले आहे.या ठिकाणी धान्याची खरेदी केव्हा सुरू होईल? हेदेखील प्रशासनाने सांगितलेले नाही. 

जळगाव बाजार समितीमध्ये मागील १० ते १२ दिवसांपासून धान्याची खरेदी बंद आहे. अशीच अवस्था धुळ्यातील दोंडाईचा, शिरपूर, जळगावमधील अमळनेर, चोपडा या बाजार समित्यांत आहे. आपली प्रशासनाकडून अडवणूक केली जाते, हमाल -माथाडींना प्रशासनाकडून त्रास दिला जातो, बाजार समितीत कुणी मजूर यायला तयार नाही, अशी कारणे अडतदार, व्यापारी सांगत आहेत. यामुळे शेतकऱ्यांना शेतमाल घरीच साठवावा लागत आहे.  शेतमाल विक्रीअभावी शेतकरी अडचणीत 

खानदेशात मका, हरभऱ्याची शिवार खरेदीदेखील मोठ्या प्रमाणात केली जाते. परंतु, ती देखील बंद असल्याने शेतकऱ्यांसमोर शेतमाल विक्रीची अडचण आहे. मळणीसाठी खर्च लागला. शेताची मशागत करण्यासह इतर बाबींसाठीही पैसे लागतील. पीक कर्ज वितरण बंद आहे. यामुळे शेतकरी आर्थिक अडचणीत आहेत. त्यांची ही समस्या सोडविली जावी, अशी मागणी शेतकरी छगन पाटील (शिरपूर) यांनी केली.