आर्द्रतेआड सोयाबीनची कमी दराने खरेदी

धामणगावरेल्वे, अमरावती  ः हंगामातील नव्या सोयाबीनची आवक बाजारात वाढली आहे. परंतु, त्यानंतरही शासकीय खरेदी सुरू झाली नाही. परिणामी, आर्द्रता अधिक असल्याचे कारण देत बाजारात कमी दराने सोयाबीन खरेदीचा सपाटा व्यापाऱ्यांनी लावला आहे.  शासनाने सोयाबीनला या हंगामासाठी ३७१० रुपयांचा हमीभाव जाहीर केला आहे. मध्यप्रदेशात संततधार पावसाचा सोयाबीनला फटका बसला. त्यामुळे महाराष्ट्रातील सोयाबीनला अच्छे दिन येत दर चार हजाराच्या पार जाण्याची शक्‍यता वर्तविली जात होती. परंतु, बाजार समितीमध्ये सद्यःस्थितीत सोयाबीनला हमीभाव मिळणेही दुरापास्त झाल्याची स्थिती आहे. जुन्या सोयाबीनची खरेदी ३६०० ते ३८०० रुपये क्‍विंटलने होत आहे. नव्या सोयाबीनला मात्र २९०० ते ३२९० रुपये क्‍विंटलचाच दर मिळत असल्याने शेतकऱ्यांची चिंता वाढली आहे. व्यापारी कमी दरात खरेदी करीत असताना नाफेडने मात्र यात अद्यापही हस्तक्षेप केला नाही. नाफेडने हमीभाव केंद्र सुरू केल्यास बाजारात तेजीचा अंदाज वर्तविला जात आहे. नाफेडच्या खरेदीकरिता आधी नोंदणीची प्रक्रिया पार पाडावी लागते. त्यानंतर शेतकऱ्यांना शेतमाल आणण्याविषयी एस.एम.एस.व्दारे कळविण्यात येते. या साऱ्या प्रक्रियेला  बराच कालावधी लागतो. त्यामुळे नोंदणीची प्रक्रिया तरी नाफेडने आत्तापासून सुरू करावी, अशी मागणीही जोर धरू लागली आहे.  सोयाबीन काढणीवर मोठा खर्च सोयाबीन काढणीची मजुरी एकरी २५०० रुपये आहे. मजुरामार्फत काढणीनंतर मळणीसाठी २०० रुपये पोत्याप्रमाणे आकारणी होते. अशाप्रकारे मोठा खर्च पिकाच्या व्यवस्थापनावर होतो.