पंढरपूर बाजार समितीकडून ‘व्हॅाटसअॅप ग्रुप’द्वारे खरेदी-विक्री

सोलापूर : कोरोना विषाणुचा प्रादुर्भाव वाढत असल्याने खबरदाराचे उपाय म्हणून पंढरपूर कृषी उत्पन्न बाजार समितीनेही भाजीपाला व फळे बाजारातील लिलाव बंद करण्याचा निर्णय घेतला आहे. परंतु, शेतकऱ्यांची सोय व्हावी, यासाठी शेतकरी आणि व्यापाऱ्यांचा व्हॅाटसअॅप ग्रुप तयार केला आहे. त्या माध्यमातून शेतकरी आणि व्यापाऱ्यांनी पालेभाजी खरेदी-विक्री करावी, असे आवाहन सभापती दिलीप घाडगे यांनी केले. 

‘कोरोना’च्या पार्श्वभूमीवर बाजार समितीमध्ये नुकतीच आमदार प्रशांत परिचारक यांच्या उपस्थितीत बैठक झाली. सभापती घाडगे यांच्यासह उपसभापती विवेक कचरे यांच्यासह संचालक उपस्थित होते. त्यावेळी चर्चेतून हा निर्णय घेण्यात आला. बाजार समितीने यापूर्वीच बेदाणा, डाळिंब आणि केळीचे सौदे बंद केले आहेत. परंतु, अत्यावश्यक सेवा कायद्यातंर्गंत भाजीपाल्याचे लिलाव चालू ठेवले होते. पण, सोलापुरात कोरोनाबाधितांची संख्या वाढत असल्याने समितीने ‘सोशल डिस्टन्सिंग’च्या दृष्टीने लिलाव बंद करण्याचा निर्णय घेतला आहे. 

दरम्यान, या बंदच्या काळात बाजार समितीने पर्यायी व्यवस्था निर्माण केली आहे. खास शेतकरी आणि व्यापाऱ्यांसाठी व्हॅाटसअॅप ग्रुप तयार केले आहेत. या ग्रुपवर खरेदी-विक्रीचे व्यवहार होतील, असे ठरवले असल्याचे घाडगे म्हणाले. 

शेतकऱ्यांनी भाजीपाल्याचे छायाचित्र आणि किंमत टाकल्यानंतर व्यापारी संबंधित शेतकऱ्यांशी संपर्क साधून त्याची खरेदी करतील. शिवाय नगरपालिकेकडून पास देऊन व्यापारी आणि शेतकऱ्यांना शहरात फिरुन,किंवा काही ठराविक ठिकाणी बसून विक्री करता येईल, अशीही सोय आहे, असेही घाडगे म्हणाले.