बुलडाणा : पीकविम्याचा प्रश्‍न अधांतरीच 

बुलडाणा : जिल्ह्यातील जळगाव जामोद मतदार संघात असलेल्या संग्रामपूर, जळगाव जामोद, शेगाव या तीन तालुक्यांतील पीकविम्याचा प्रश्‍न अधांतरीच आहे. विमा कंपनी शासन हिश्‍शाची प्रतीक्षा करीत थांबलेली आहे. तर शासन कंपनीवर जबाबदारी देऊन मोकळे होत असल्याचे एकूणच चित्र बघायला मिळत आहे. १ सप्टेंबरला कृषिमंत्र्यांच्या उपस्थितीत मुंबईत झालेल्या बैठकीत विमा कंपनीला बुधवारी (ता.१५) पर्यंत विम्याची रक्‍कम जमा करण्याची मुदत लोकप्रतिनिधींनी दिली होती. या काळात पैसे जमा न झाल्याने आता या प्रकरणी इशारा देणारे जळगाव जामोदचे आमदार, माजी मंत्री डॉ. संजय कुटे यांच्या भूमिकेकडे शेतकऱ्यांच्या नजरा लागल्या आहेत.  जिल्ह्यातील पीकविम्याच्या प्रश्‍नावर मंत्रालयात कृषिमंत्री दादा भुसे यांच्या दालनात १ सप्टेंबरला बैठक झाली होती. गेल्या हंगामात शेतकऱ्यांचे नुकसान झाल्याने ते विमा भरपाईस पात्र ठरले होते. त्यांना विमा मंजूरही झालेला आहे. कृषिमंत्र्यांच्या उपस्थितीत झालेल्या बैठकीत यावर सविस्तर चर्चा झाल्यानंतर कोणत्याही परिस्थितीत शेतकऱ्यांना १५ सप्टेंबरपर्यंत पीकविमा देण्यात यावा, असा आग्रह डॉ. कुटे यांनी धरला होता. तसे न झाल्यास कंपनीच्या विरोधात तीव्र आंदोलन छेडण्याचा इशाराही त्यांनी तेव्हा दिला. गेले १५ दिवस पीकविम्यास पात्र असलेले शेतकरी प्रतीक्षा करीत थांबलेले आहेत. मात्र या काळात पीकविमा भरपाईबाबत कुठलीही हालचाल झालेली नाही. हे लक्षात डॉ. कुटे काही शेतकऱ्यांसह मुंबईत दाखल झाले आहेत. त्यांनी विमा कंपनी, कृषी विभागाच्या अधिकाऱ्यांच्या भेटी घेत पाठपुरावा सुरू केला. या दरम्यान विमा कंपनीकडून शासनाच्या हिश्‍शाची बाब पुढे केली जात असल्याचे समोर आले. शासनाचा हिस्सा मिळताच शेतकऱ्यांचे पैसे तत्काळ जमा करण्याबाबत कंपनीचे अधिकारी सांगत असल्याचे डॉ. कुटे म्हणाले. दुसरीकडे शासन हे विमा कंपनीवर जबाबदारी ढकलत आहे. 

...तर आंदोलन करणारच : डॉ. कुटे  अल्टिमेटम देऊनही पीकविमा जमा झालेला नाही. त्यामुळे या प्रश्‍नाला तडीस नेण्यासाठी आता आंदोलनाशिवाय पर्याय दिसत नाही. गुरुवारी (ता.१६) विमा कंपनी व अधिकाऱ्यांसोबत एकदा पुन्हा चर्चा करू. ठोस काही होणार नसेल तर मी व शेतकऱ्यांना सोबत घेऊन आंदोलन सुरू करणार आहे, असे आमदार डॉ. संजय कुटे यांनी सांगितले.