पावसाअभावी रब्बीच्या पेरणीवर प्रश्‍नचिन्ह

सांगली ः जिल्ह्यात अपेक्षित पाऊस झाला नाही. जिल्ह्यातील काही भागात नुकतीच पावसाने हजेरी लावली. पण पुन्हा पावसाने दडी मारली आहे. यामुळे रब्बीचा पेरा कसा होणार अशी चिंता बळिराजाला लागून लागली आहे.

जिल्ह्यातील खरीप हंगामातील पिकांची काढणी सुरू झाली आहे. शेतकरी रब्बी हंगामाची तयारी करू लागला आहे. अनेक भागांत शेतकऱ्यांनी शेतीची मशागतीही करून ठेवल्या आहेत. मात्र, पावसाने दडी मारल्याने रब्बी हंगामातील पिकांची पेरणी कशी करायची असा प्रश्‍न निर्माण झाला आहे. दुष्काळी पट्ट्यातील आटपाडी, जत, कवठेमहांकाळ, तासगाव तालुक्‍यांत रब्बी हंगामाचे मोठे क्षेत्र आहे. गेल्या दोन ते तीन दिवसांपासून पावसाने उघडीप दिली आहे. त्यामुळे खरीप हंगामातील सोयाबीन, उडीद, मूग पिकाची काढणी आणि मळणी करण्यास वेग आला आहे.

जिल्ह्यात पाऊस झाला नसल्याने खरीप हंगामातील पिकांच्या उत्पादनात घट झाली आहे. यामुळे घातलेला खर्चही मिळणासा झाला आहे. आता रब्बी हंगामातील पिकांवर शेतकऱ्यांच्या आशा लागून राहिलेल्या आहेत. परतीचा पाऊस वेळेत झाला तरच रब्बी हंगामातील पिकांची पेरणीसाठी शेतकरी पुढे येतील.

पाणी मागणी अर्जासाठी नोटिसा म्हैसाळ उपसा सिंचन योजनेच्या लाभ क्षेत्रात असणाऱ्या प्रत्येक गावातील ग्रामपंचायत आणि तलाठी कार्यालयाच्या फलकावर पाटबंधारे विभागाने पाणी मागणीसाठी अर्ज करण्यासाठी नोटिसा लावण्यात आलेल्या आहेत. शेतकऱ्यांनी मागणी केली तरच योजना सुरू होणार आहे.

टंचाई कृती आराखडा तयार करण्यास सुरवात जिल्ह्यात पाणीटंचाईचे संकट येऊ घातले आहे. यामुळे ही पाणीटंचाई दूर करण्यासाठी संभाव्य पाणीटंचाई कृती आराखडा तयार करण्याचे आदेश शासनाकडून देण्यात आले आहेत. यामुळे जिल्ह्यात तातडीने सन २०१८-१९ चा पाणीटंचाई कृती आराखडा तयार करण्यास सुरवात केली असल्याची माहिती, जिल्हा परिषदेच्या सूत्रांनी दिली.

जत तालुक्‍यात रब्बी हंगामातील पेरण्या सुरू जत तालुक्‍यात परतीच्या पावसावर रब्बी हंगामात पेरण्या केल्या जातात. तालुक्‍यात काही भागात पावसाने हजेरी लावली आहे. त्यामुळे शेतकऱ्यांनी पेरण्या करण्यासाठी नियोजन केले आहे. तर काही ठिकाणी पेरण्या देखील सुरू झाल्या आहेत. मात्र, पावसाने उघडीप दिल्याने शेतकरी चिंतातूर झाला आहे.