नांदेड परिमंडळातील प्रलंबित वीजजोडण्यांचा प्रश्न मार्गी

नांदेड ः महावितरणच्या नांदेड परिमंडळातील नांदेड, परभणी, हिंगोली या जिल्ह्यांतील शेतकऱ्यांनी अनेक महिन्यांपूर्वी अनामत रक्कम भरूनही प्रलंबित असलेल्या १६ हजार २०९ कृषिपंपांच्या वीजजोडणीचा प्रश्न मार्गी लागला आहे. या कृषिपंपांना महावितरणने जाहीर केलेल्या उच्चदाब वितरण प्रणाली (एचव्हीडीएस) द्वारे वीजजोडणी देण्यात येणार आहे. त्यासाठी २४१ कोटी ३१ लाख रुपये निधीची तरतूद आहे. त्या अनुषंगाने निविदा प्रक्रिया सुरू करण्यात आली आहे, अशी माहिती महावितरणच्या सूत्रांनी दिली.

या योजनेअंतर्गत ३१ मार्च २०१८ अखेरपर्यंत अनामत रक्कम भरून वीजजोडणी प्रलंबित असलेल्या नांदेड जिल्ह्यातील ६ हजार ८१५ कृषिपंपाना वीजजोडणी दिली जाणार आहे. त्यासाठी ११३ कोटी ७ लाख रुपये निधीची तरतूद करण्यात आली आहे. परभणी जिल्ह्यातील ४ हजार २९२ कृषिपंपाना वीजजोडणी दिली जाणार असून, त्यासाठी ५८ कोटी ९२ लाख रुपये तसेच हिंगोली जिल्ह्यातील ५ हजार १०२ कृषिपंपांच्या जोडणीसाठी  ६९ कोटी ३२ लाख रुपयांची तरतूद करण्यात आली आहे.

सध्या परिमंडळातील कृषी पंपधारकांना ६५ आणि १०० केव्हीए क्षमतेच्या एका रोहित्रावरून २० ते २५ कृषिपंपासाठी वीजपुरवठा केला जातो. आकडे टाकून वीज वापरणाऱ्यांचीही संख्या मोठी आहे. वीजचोरीमुळे दाब वाढून रोहित्र जळण्याचे प्रमाण लक्षणीय आहे. सध्याच्या पद्धतीमुळे लघुदाबवाहिनीची लांबी वाढते. वीजहानी मोठ्या प्रमाणावर होते. परिणामी कमी दाबाने वीजपुरवठा होऊन वारंवार खंडित होतो. या समस्यांवर उच्चदाब वितरण प्रणालीद्वारे मात करता येणे शक्य होणार आहे. आकडे टाकून वीजचोरी करता येणार नाही. एका रोहित्रावरून दोन अथवा जास्तीत जास्त तीनच कृषिपंपाना वीजजोडणी दिली जाणार आहे. त्यामुळे कृषिपंपांना शाश्वत वीजपुरवठा होणार आहे, असे सूत्रांनी सांगितले.

शेतकऱ्यांची हेळसांड कायमची बंद होणार नांदेड, परभणी, हिंगोली जिल्ह्यांमध्ये उच्चदाब वीजप्रणालीद्वारे एका वितरण रोहित्रावर जास्तीत जास्त दोन ते तीन कृषिपंपाचा भार असणार आहेत. त्यामुळे एकाच रोहित्रावर येणारा दाब विभागला जाणार असल्याने योग्य दाबाने, अखंडित वीजपुरवठा मिळणार आहे. सातत्याने वीजपुरवठा खंडित झाल्यामुळे होणाऱ्या त्रासापासून सुटका होणार असून, वारंवार रोहित्र जळाल्यामुळे होणारी शेतकऱ्यांची हेळसांड कायमची बंद होणार आहे.