इथेनॉल प्रकल्पासाठी जागेचा प्रश्‍न अजेंड्यावर : डॉ. गिते

भंडारा ः मकरधोकडा येथे प्रस्तावीत तणसापासून इथेनॉल आणि सीएनजी प्रकल्पाकरिता जागेचा प्रश्‍न सोडविण्याचे काम अजेंड्यावर ठेवत ते तातडीने मार्गी लावण्यासाठी प्रयत्न केला जाणार आहे, अशी माहिती नवनियुक्‍त जिल्हाधिकारी डॉ. नरेश गिते यांनी दिली.  जिल्हाधिकारी म्हणून पदभार स्वीकारल्यानंतर त्यांनी विविध विभागांतील अधिकाऱ्यांसोबत संवाद साधला. या वेळी मुख्य कार्यकारी अधिकारी रवींद्र जगताप, अपर जिल्हाधिकारी विलास ठाकरे, निवासी उपजिल्हाधिकारी प्रमोद भुसारी, अतिरिक्‍त मुख्य कार्यकारी अधिकारी डॉ. सुभाष पवार उपस्थित होते. प्रभारी जिल्हाधिकारी रवींद्र जगताप यांच्याकडून डॉ. गिते यांनी पदभार स्वीकारला. जिल्हाधिकारी गीते म्हणाले, की आपल्याकडे येणाऱ्या सामान्य माणसाला न्याय मिळायला हवा या दृष्टिकोनातून प्रत्येकाने काम करणे अपेक्षित आहे. वैयक्‍तिक लाभाच्या योजनावर भर देण्यात यावा. कुठलेही काम प्रलंबित राहणार नाही. या अनुषंगाने दैनंदिन कामकाजाचे नियोजन करण्यात यावे. कामात स्पष्टता असावी व प्रलंबितता शून्य असावी यावर भर देण्यात यावा.