नांदेड जिल्ह्यातील रब्बी क्षेत्रात दीडपटीहून अधिक वाढ

नांदेड : ‘‘यंदाच्या रब्बी हंगामात पुरेशा प्रमाणात सिंचनासाठी पाणी उपलब्ध असल्यामुळे जिल्ह्यातील रब्बीच्या पेरणी क्षेत्रात दीडपटीहून अधिक वाढ झाली आहे. जिल्ह्यात रब्बीचे सर्वसाधारण क्षेत्र १ लाख ३६ हजार ७१२ हेक्टर आहे. यंदा गुरुवार(ता. २६)अखेर २ लाख १४ हजार ६१० हेक्टरवर म्हणजेच १५६.९८ टक्के क्षेत्रावर पेरणी झाली आहे. अद्याप पेरणी सुरू आहे. त्यामुळे रब्बीच्या पेरणी क्षेत्रात आणखीन भर पडणार आहे’’, असे जिल्हा अधीक्षक कृषी अधिकारी रविशंकर चलवदे यांनी सांगितले.

जिल्ह्यात रब्बीचे सर्वसाधारण क्षेत्र १ लाख ३६ हजार ७१२ हेक्टर आहे. यामध्ये ज्वारीचे २६ हजार ९७५ हेक्टर, गव्हाचे ३८ हजार ५३८ हेक्टर, मक्याचे ३ हजार १७८ हेक्टर, हरभऱ्याचे ६२ हजार ३४९ हेक्टर, करडईच्या ४ हजार ७६८ हेक्टर क्षेत्राचा समावेश आहे. गुरुवारपर्यंत जिल्ह्यातील सर्व १६ तालुक्यांमध्ये एकूण २ लाख १४ हजार ६१० हेक्टरवर १५६.९८ टक्के पेरणी झाली आहे.

अन्नधान्य आणि चारा पीक म्हणून शेतकऱ्यांनी पसंती दिल्यामुळे ज्वारीच्या पेरणी क्षेत्रात वाढ झाली. ज्वारीने सर्वसाधारण क्षेत्राचा टप्पा ओलांडला आहे. रब्बीतील प्रमुख नगदी पीक असलेल्या हरभऱ्याला यंदा शेतकऱ्यांनी सर्वात अधिक प्राधान्य दिले. त्यामुळे आजवर हरभऱ्याची १ लाख ५७ हजार १७३ हेक्टरवर म्हणजेच २५२.०९ टक्के क्षेत्रावर पेरणी झाली आहे. गव्हाची ६० टक्क्यांच्या जवळपास पेरणी झाली. करडईचे क्षेत्रात गतवर्षी प्रमाणेच यंदाही घट कायम आहे. आजवर ३८.०७ टक्के क्षेत्रावर पेरणी झाली आहे.

जिल्ह्यातील १३ तालुक्यांनी सर्वसाधारण पेरणी क्षेत्राचा टप्पा पार केला आहे. सर्वसाधारण क्षेत्रापेक्षा अधिक पेरणी झालेल्या तालुक्यांमध्ये नांदेड, अर्धापूर, हदगाव, माहूर, किनवट, भोकर, उमरी, धर्माबाद, नायगाव, बिलोली, देगलूर, कंधार, लोहा या तालुक्यांचा समावेश आहे. मुदखेड, हिमायतनगर, मुखेड या तीन तालुक्यांत सर्वधारण क्षेत्रापेक्षा कमी पेरणी झाली  आहे.

पीकनिहाय पेरणी स्थिती (हेक्टरमध्ये