परभणी, हिंगोली जिल्ह्यांत पावसाने रब्बी पिकांचे नुकसान

परभणी : परभणी, हिंगोली, नांदेड जिल्ह्यांत मंगळवारी (ता. १७) रात्री, तसेच मध्यरात्री झालेल्या अवकाळी पावसामुळे रब्बी हंगामातील शेतामध्ये सोंगून ठेवलेल्या तसेच उभ्या ज्वारी, गहू, हरभरा आदी पिके भिजल्याने नुकसान झाले आहे. परभणी जिल्ह्यातील सेलू तालुक्यातील चिकलठाणा मंडळामध्ये सर्वाधिक ३० मिमी पाऊस झाला. परभणी शहर मंडळात २ मिमी, परभणी ग्रामीण मंडळात ४ मिमी, पेडगाव मंडळात ५.६० मिमी, जांब मंडळात ५.३० मिमी, सेलू मंडळात ८ मिमी, देऊळगाव मंडळामध्ये ३ मिमी, कुपटा मंडळात ४ मिमी, वालूर मंडळात २ मिमी, चिकलठाणा मंडळात ३० मिमी, जिंतूर मंडळात २ मिमी, सावंगी म्हाळसा मंडळात ४ मिमी, चारठाणा मंडळात ३ मिमी, बामणी मंडळात ५ मिमी पाऊस झाला. हिंगोली जिल्ह्यातील वसमत मंडळात २.२५ मिमी, आंबा मंडळात ३.७५ मिमी, हयातनगर टेंभुर्णी ३.५, कुरुंदा ३.५० मिमी आदीसह आंबा, वांरगा, औंढा, जवळा बाजार, साळणा, सेनगाव, गोरेगाव, आजेगाव, साखरा, पानकनेरगाव आदी मंडळांमध्ये हलका ते मध्यम पाऊस झाला. नांदेड जिल्ह्यातील अर्धापूर मंडळासह अन्य मंडळांत हलका ते मध्यम पाऊस झाला. सध्या या तीन जिल्ह्यांमध्ये ज्वारी, गहू, हरभरा, करडई या पिकांची सुगी सुरू आहे. अवकाळी पावसामुळे शेतात कापून ठेवलेली ज्वारी, गहू तसेच हरभरा पिके भिजल्याने कडबा तसेच धान्याची प्रत खराब झाली आहे.