खानदेशात रब्बीत अत्यल्प पीक कर्जवाटप

जळगाव ः खानदेशात रब्बी हंगामातील पेरण्या जवळपास ९० टक्के पूर्ण झाल्या आहेत. परंतु पीक कर्जवाटपासंबंधीची गती वाढलेली नाही. खरिपाप्रमाणे रब्बीतही ४० टक्केही पीक कर्जवाटप होणार नाही, अशी स्थिती आहे.  रब्बी हंगामासंधी जळगाव जिल्ह्यात सुमारे ६०० कोटी, धुळ्यात २०० कोटी व नंदुरबारातही सुमारे १५५ कोटी रुपयांचा आराखडा मंजूर झाला आहे. सर्वाधिक पीक कर्जवितरण जिल्हा बॅंकांना करायचे आहे. परंतु, जिल्हा बॅंकांकडे रब्बीसंबंधी पीककर्ज मागणीचे अर्ज येत नसल्याचे सांगितले जात आहे. जिल्हा बॅंकांचे अनेक सभासद किंवा कर्जदार शेतकरी थकबाकीदार झाले आहेत. मागील हंगामातही रब्बी हंगामात ३० टक्केही पीककर्ज वितरण झाले नव्हते. जळगाव जिल्ह्यात सेंट्रल बॅंक अग्रणी बॅंक म्हणून काम करीत आहे. तर नंदुरबारात स्टेट बॅंक अग्रणी बॅंकेच्या भूमिकेत आहे. या दोन्ही बॅंकांकडूनही रब्बीमधील पीक कर्जवाटपाचा लक्ष्यांक अद्याप ४० टक्केही पूर्ण झालेला नाही. धुळे जिल्ह्यात जिल्हा बॅंकेला रब्बीमध्ये पीककर्ज वितरणाचा लक्ष्यांक देण्यात आलेला नाही. यामुळे या बॅंकेकडून रब्बीमध्ये पीक कर्ज वितरण होणार नसल्याचे सांगण्यात आले.  नंदुरबार जिल्ह्यात सुमारे २० टक्के, धुळ्यात १४ टक्के तर जळगाव जिल्ह्यातही १५ टक्‍क्‍यांपर्यंत रब्बीसंबंधीचे पीककर्ज वितरित झाले आहे.