नगर जिल्ह्यात रब्बी पेरणीचा टक्का कमीच

नगर ः जिल्ह्यात रब्बीच्या पेरणीला अजूनही फारसा वेग येताना दिसत नाही. बऱ्याच पिकांच्या पेरणीचा कालावधी संपला आहे. आतापर्यंत केवळ २३ टक्के पेरणी झाली आहे. ज्वारीसह मका, गहु, हरभऱ्याची पेरणीही अल्पच आहे. रब्बी पिकांचे घटते क्षेत्र कांद्याने व्यापण्याची शक्यता दिसत आहे. 

नगर जिल्ह्यात रब्बीचे ७ लाख २६ हजार २९२ हेक्टर सरासरी क्षेत्र आहे. त्यात सर्वाधिक ज्वारीचे ४ लाख ७७ हजार ०१८ हेक्टर, तर १ लाख ५३ हजार ५२७ हेक्टर क्षेत्र हरभऱ्याचे आहे. गव्हाचे सरासरी ५६ हजार ८२६ हेक्टर क्षेत्र असले तरी एक लाख हेक्टवरपेक्षा अधिक क्षेत्रावर गव्हाची पेरणी होत आहे.

रब्बीमधील पेरणीत ज्वारीची १५ सप्टेंबर ते १५ आक्टोबर, गहु व हरभऱ्याची १ आक्टोबर ते १५ डिसेंबर या कालावधीत सर्वसाधारणपणे पेरणी होते. मात्र कापूस क्षेत्र असलेल्या भागात मका, गव्हाची जानेवारीपर्यंत पेरणी होते. रब्बी व उन्हाळी कांद्याची जानेवारीअखेरपर्यंत लागवड होते. आतापर्यंत ज्वारीची २३ टक्के, गव्हाची २२ टक्के, मक्याची १६ टक्के, तर हरभऱ्याची १४.७६ टक्के पेरणी झाली आहे. रब्बीच्या पेरणीला अजून फारसा वेग आलेला नाही. 

जिल्ह्यात रब्बीत ज्वारीचे क्षेत्र ४ लाख ७७ हजार ०१८ हेक्टर तर १ लाख ५३ हजार ५२७ हेक्टर क्षेत्र हरभऱ्याचे आहे. ज्वारीची केवळ २३ टक्के म्हणजे १ लाख २८ हजार ५७४ हेक्टरवर पेरणी झाली आहे. कोपरगाव, राहुरी, संगमनेर, अकोले, राहाता, श्रीरामपूर, कर्जत तालुक्यात ज्वारीची पेरणी नाही. गव्हाची २२ टक्के, हरभऱ्याची सात टक्के पेरणी झाली. 

कांदा, गहु वाढण्याचा अंदाज 

जिल्ह्यात रब्बीतील ज्वारीसह इतर क्षेत्रात घट होणार आहे. त्या जागी कोणत्या पिकांची पेरणी होणार? या बाबत जिल्हा अधिक्षक कृषी अधिकारी व जिल्हा परिषद कृषी विभागाने कोणतेही नियोजन केल्याचे दिसत नाही. मात्र जाणकारांच्या मतानुसार यंदा बहुतांश भागात पाण्याची मुबलक उपलब्धता आहे. त्यामुळे कांदा आणि गव्हाचे क्षेत्र वाढणार असल्याचा अंदाज आहे.