सातारा जिल्ह्यात रब्बीची ६८ टक्के पेरणी

सातारा  ः जिल्ह्यात रब्बी पेरणीस वेग आला आहे. मंगळवारअखेर (ता. ४) ६८.४१ टक्के क्षेत्रावर रब्बी पिकांची पेरणी झाली आहे. जिल्ह्यात सर्वाधिक रब्बी ज्वारीची पेरणी झाली असल्याची माहिती कृषी विभागाच्या सूत्रांनी दिली.   

जिल्ह्यात रब्बी हंगामातील पिकांचे सर्वसाधारण पेरणी क्षेत्र दोन लाख १४ हजार ८२२ हेक्‍टर असून, त्यापैकी (ऊस वगळून) एक लाख ४६ हजार ९५४ हेक्‍टर क्षेत्रावर म्हणजेच ६८.४१ टक्के पेरणी झाली आहे. माण तालुक्‍यात सर्वाधिक २७ हजार ९८३ हेक्‍टर क्षेत्रावर पेरणी झाली आहे. रब्बी ज्वारीची यंदा सर्वाधिक पेरणी झाली आहे. रब्बी ज्वारीचे सर्वसाधारण क्षेत्र एक लाख ३९ हजार १११ हेक्‍टर असून, त्यापैकी एक लाख पाच हजार ६०५ हेक्‍टर क्षेत्रावर पेरणी झाली आहे. थंडीत वाढ होऊ लागल्याने हरभरा, गहू पिकांच्या पेरणीस वेग आला आहे. हरभऱ्याचे सर्वसाधारण क्षेत्र २८ हजार ८८३ हेक्‍टर असून, त्यापैकी १७ हजार ५३५ हेक्‍टर क्षेत्रावर पेरणी झाली आहे.

गहू पिकाचे ३४ हजार ४७३ हेक्टर सर्वसाधारण क्षेत्र असून, गव्हाची १५ हजार ३७३ हेक्टर क्षेत्रावर पेरणी झाली आहे. मक्‍याचे सर्वसाधारण क्षेत्र १० हजार ९४१ हेक्‍टर असून, सहा हजार १३७ हेक्‍टर क्षेत्रावर लागवड झाली आहे.

पश्चिमेकडील तालुक्यांमध्येही पेरणीची कामे सुरू आहे. उसात आंतरपिक म्हणून हरभरा, मक्याची लागवड करण्याकडे कल वाढला आहे. माण, खटाव, फलटण, कोरेगाव या दुष्काळी तालुक्यात पेरणीची कामे मोठ्या प्रमाणात उरकली आहे. मात्र, या तालुक्यात भीषण पाणीटंचाई निर्माण होऊ लागल्याने शेतकऱ्यांमध्ये चिंतेचे वातावरण झाले आहे.

तालुकानिहाय पेरणीक्षेत्र (हेक्‍टर) ः सातारा - १२,३३१, जावली - ४५०५, पाटण - ११,७५९, कऱ्हाड - ९,३१२, कोरेगाव - २२,७५०, खटाव -१६,९८५, माण-२७,९८३, फलटण - २१,६५७, खंडाळा - ८६०५, वाई - १०,६१२, महाबळेश्वर - ४५५.