पुणे : गेल्या आठवड्यापासून ढगाळ वातावरण तयार होत आहे. काही ठिकाणी तुरळक सरी बरसत आहेत. यामुळे रब्बीच्या पेरण्या खोळंबल्या आहेत. अनेक ठिकाणी पेरण्या संथ गतीने सुरू आहेत. आतापर्यंत पुणे विभागात सरासरीच्या १४ लाख ४९ हजार ७ हेक्टरपैकी पाच लाख ५१ हजार २८३ हेक्टर म्हणजेच अवघे ३८ टक्के पेरणी झाली आहे. येत्या काळात थंडी वाढल्यास अधिक वेगाने पेरण्या सुरू होतील, अशी शक्यता कृषी विभागाच्या सूत्रांनी वर्तविली.
पावसाच्या उघडिपीनंतर काही प्रमाणात थंडी वाढल्यानंतर पेरण्यांना सुरवात झाली होती. नगर जिल्ह्यात ज्वारी, गहू, मका व हरभरा या पिकांच्या पेरणीस सुरवात झाली आहे. सद्यस्थितीत रब्बी ज्वारी वाढीच्या व पोटरीच्या अवस्थेत आहे. गहू, मका व हरभरा पिके वाढीच्या अवस्थेत आहेत. पुणे जिल्ह्यातही रब्बी हंगामातील पिकांची पेरणी सुरू झाली. ज्वारी, मका व हरभरा पिके वाढीच्या अवस्थेत आहे.
सोलापूरमध्ये खरीप हंगामातील तूर पिके दाणे भरण्याच्या अवस्थेत आहे. रब्बी हंगामातील ज्वारी पीक वाढीच्या अवस्थेत आहे. पीक परिस्थिती चांगली आहे. गेल्या आठवड्यामध्ये झालेला पाऊस ज्वारी पिकांसाठी पोषक ठरला आहे.
हरभरा पिकांची उगवण चांगली असून पिकांची पेरणी सुरू आहे. गहू पिकांची पेरणी प्रगतीपथावर आहे. मात्र, अधूनमधून होत असलेल्या ढगाळ हवामानामुळे पेरणीमध्ये अडथळे तयार होत आहेत. त्यामुळे अजूनही पेरण्यांना फारसा वेग आलेला नाही.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.