कापडणे, जि. धुळे : जिल्ह्यात खरीप हंगामात पावसाने सलग तीन महिने हजेरी लावली. नदीनाल्यांना पूर आले. लहानमोठ्यांसह सर्वच धरणे तुडुंब भरून ओसंडली. रब्बीसाठी पहिले आवर्तन सोडण्यासाठी तयारी सुरू आहे. विहिरी आणि कूपनलिकेच्या पाण्याने हरभरा आणि गव्हाची पेरणी पूर्ण झाली आहे. रब्बीतील कोळपणी सुरू आहे. यावर्षी गेल्या वर्षीपेक्षा रब्बीच्या क्षेत्रात मोठी वाढ होणार आहे.
जिल्ह्यातील पांझरा, मालनगाव, जामखेडी, कनोली, बुराई, करवंद, अनेर, सोनवद, वाडी शेवाडी, अमरावती, सुलवाडे, धुळे मध्यम प्रकल्प, मुकटी आदी प्रकल्प व धरणे तुडूंब भरले आहेत. यांचे पाणी रब्बीसाठी दिले जाते. हजारो हेक्टर क्षेत्र ओलिताखाली येणार आहे. सध्या पहिले आवर्तन देण्यासाठी पाटबंधारे विभागाची तयारी सुरू झाल्याचे समजते.
जिल्ह्यातील जलसाठ्यात विक्रमी जलसंचय आहे. कूपनलिका व विहिरींची पाणी पातळीही मोठी वाढली आहे. रब्बीतील गहू, हरभरा, बाजरी आणि ज्वारीच्या पेऱ्यात यावर्षी अधिकची वाढ झाली आहे. रब्बीचे क्षेत्र दुप्पटीने वाढणार आहे.
गहू, हरभरा तरारला
कूपनलिका आणि विहिरीच्या पाण्यावरचा रब्बीचा पेरा ऑक्टोबरमध्येच पूर्ण झाला आहे. गहू, हरभऱ्या‍ची पिके चांगलीच तरारली आहेत. थंडीमुळे जोरकस वाढ होत आहे. शेतकऱ्यांनी कोळपणीची कामेही सुरू केली आहेत.
यावर्षी पाण्याचा साठा अधिक आहे. गहू आणि हरभऱ्या‍ला बऱ्यापैकी भाव असतो. हे पीक हमीची उत्पादन देते. साठवताही येते. त्यामुळे यांच्या क्षेत्रात वाढ केली आहे. - बन्सीलाल माळी, शेतकरी
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.