नाशिक : रब्बी हंगामाच्या क्षेत्रात ३० टक्‍क्‍यांनी वाढीची शक्यता

येसगाव, जि. नाशिक ः दमदार पावसामुळे गाव व परिसरात विहिरी तुडुंब भरलेल्या आहेत. अद्याप जमिनीतही मोठ्या प्रमाणात ओलावा टिकून आहे. त्यामुळे परिसरात रब्बीच्या क्षेत्रात ३० ते ३५ टक्के वाढ होण्याची शक्‍यता आहे, असे कृषी मंडल अधिकारी आर. व्ही.  पवार यांनी सांगितले.

ऊन पडल्यामुळे बाजरी, मका पिकांची जलद गतीने आवरासावर चालू आहे. खरीप पिकांच्या नुकसानीचे पंचनामे केले जात आहेत. गेल्या वर्षी पावसाअभावी दुष्काळ होता. अपेक्षित पाऊस न पडल्यामुळे खरीप पिके आले नाहीत. विहिरींना पाणी नसल्यामुळे रब्बी हंगाम मोठ्या प्रमाणात घटला होता. यावर्षी सरासरीच्या दीडशे टक्‍क्‍यांपेक्षा जास्त पाऊस झाला. त्यामुळे परिसरातील केटीवेअर, पाझर तलाव, बंधारे पाण्याने भरले आहेत. नदी-नाले खळखळ वाहत आहेत. त्यामुळे जमिनीत ओल वाढली. पर्यायाने विहिरींना मुबलक पाणी आहे. 

रब्बीसाठी स्वच्छ वातावरण तयार झाले आहे. अतिपावसामुळे लावलेले कांदे व कांद्याचे रोपे नष्ट झाली आहेत. कांदे बियाण्यांचा भाव गगनाला भिडला आहे. कांद्याचे नवीन बियाणे उपलब्ध नसल्यामुळे कांद्याऐवजी गहू, हरभरा लागवडीत वाढ होईल, असे शेतकऱ्यांचे म्हणणे आहे. रब्बीची लागवड उद्दिष्टापेक्षा जास्त होण्याची शक्‍यता आहे. सर्व जमीन रब्बीखाली येईल, अशी अपेक्षा शेतकऱ्यांना आहे.

यावर्षी दमदार पाऊस झाला आहे. मागील वर्षी पाण्याअभावी रब्बी हंगाम समाधानकारक झाला नाही. यावर्षी मुबलक पाण्यामुळे रब्बीचे क्षेत्र वाढेल. साधारणतः ३० ते ३५ टक्के क्षेत्र वाढू शकेल.  - आर. व्ही. पवार, मंडल अधिकारी

रब्बी पीक घेण्यासाठी शेतातील नुकसानग्रस्त मका, बाजरीची आवराआवर युद्धपातळीवर सुरू आहे. रब्बीसाठी जमिनीची मशागत केली जात आहे. गहू, हरभरा या पिकांवर भर राहील.- संजय सूर्यवंशी, शेतकरी