लातूर : मराठवाड्यातील रब्बी पेरणीची गती अजूनही संथच असल्याची स्थिती आहे. आठही जिल्ह्यांत सर्वसाधारण क्षेत्राच्या तुलनेत जवळपास १८ टक्‍के क्षेत्रावरीलच पेरणी उरकल्याचे चित्र आहे. हातचा गेलेला खरीप, अतिपावसामुळे वाफश्‍यावर न आलेल्या जमिनी, जमीन तयार करण्यासाठी लागलेला वेळ, काही ठिकाणी करावी लागलेली दुबार पेरणी, बियाणे व खतांसाठी नसलेला पैसा आदी कारणामुंळे रब्बी पेरणीस विलंब होत आहे.
मराठवाड्यात रब्बीचे सर्वसाधारण क्षेत्र जवळपास १९ लाख हेक्‍टर आहे. त्या तुलनेत गत आठवडाअखेपर्यंत आठही जिल्ह्यांत १ लाख ४५ हजार ३३१ हेक्‍टरवर रब्बीची पेरणी झाली. जिल्ह्यात पेरणीची गती जास्त, तर नांदेड, हिंगोली जिल्ह्यांत कमी असल्याचे चित्र आहे. औरंगाबाद जिल्ह्यात यंदा रब्बीचे सर्वसाधारण क्षेत्र २ लाख ८ हजार १८८ हेक्‍टर होते. त्या तुलनेत १६ हजार ९५५ हेक्‍टरवर अर्थात केवळ ८.१४ टक्‍के क्षेत्रावरच पेरणी झाली.
जालना जिल्ह्यात सर्वसाधारण १ लाख ७४ हजार ३६८ हेक्‍टरच्या तुलनेत ३० हजार ३७७ हेक्‍टर अर्थात १७.४२ टक्‍के क्षेत्रावर पेरणी झाली. बीड जिल्ह्यात सर्वसाधारण क्षेत्र ४ लाख २२ हजार ७३० हेक्‍टर आहे. तरीही ९७ हजार ३० हेक्‍टरवर अर्थात २२.९५ टक्‍के क्षेत्रावर पेरणी झाली आहे. लातूर जिल्ह्यात सर्वसाधारण १ लाख ९५ हजार १६३ हेक्‍टरच्या तुलनेत ३९ हजार ६६१ हेक्‍टरवर पेरणी झाली.
उस्मानाबाद जिल्ह्यात सर्वसाधारण ३ लाख ३१ हजार ४९६ हेक्‍टरच्या तुलनेत ४७ हजार ३३७ हेक्‍टरवर, परभणी जिल्ह्यात सर्वसाधारण ३ लाख १ हजार ४३१ हेक्‍टरच्या तुलनेत ९ हजार ९७१ हेक्‍टरवर, तर नांदेड व हिंगोली जिल्ह्यांत पेरणी झाल्याची माहिती कृषी विभागाकडे उपलब्ध नसल्याची स्थिती आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.