राहुल गांधी यांची आज संगमनेरात सभा

नगर : शिर्डी लोकसभा मतदारसंघातील काॅँग्रेसचे उमेदवार भाऊसाहेब कांबळे व नाशिक लोकसभा मतदारसंघातील राष्ट्रवादी काॅँग्रेसचे उमेदवार समीर भुजबळ यांच्या प्रचारार्थ काॅँग्रेसचे अध्यक्ष राहुल गांधी यांची शुक्रवारी (ता. २६) संगमनेरमध्ये सभा होणार आहे. शहरातील जाणता राजा मैदानावर सायंकाळी पाच वाजता ही सभा होईल, अशी माहिती काॅँग्रेसचे स्टार प्रचारक तथा ज्येष्ठ नेते बाळासाहेब थोरात यांनी दिली.  पक्षातर्फे आज सभेची वेळ निश्‍चित करण्यात आली. ज्येष्ठ नेते थोरात यांच्या आग्रहास्तव या सभेचे नियोजन करण्यात आले आहे. गांधी यांनी काॅँग्रेसच्या अध्यक्षपदाची जबाबदारी स्वीकारल्यानंतर ते प्रथमच जाहीर सभेच्या निमित्ताने नगर जिल्ह्यात येत आहेत. त्यामुळे या सभेला विशेष महत्त्व आहे. तथापि, सभेच्या नियोजनासाठी पक्षाकडे अत्यंत कमी वेळ असल्याने पदाधिकारी व कार्यकर्त्यांची धावपळ सुरू झाली आहे. त्याशिवाय प्रशासनाचीदेखील सुरक्षिततेच्या दृष्टीने पळापळ सुरू झाली आहे.  काॅँग्रेसचे प्रदेशाध्यक्ष तथा खासदार अशोक चव्हाण, माजी मंत्री छगन भुजबळ, विधान परिषदेतील विरोधी पक्षनेते धनंजय मुंडे यांच्यासह दोन्ही पक्षांचे प्रमुख पदाधिकारी या सभेला उपस्थित राहणार आहेत. संगमनेर तालुका काॅँग्रेस कमिटीतर्फे सभेचे नियोजन सुरू करण्यात आले असून, पोलिस अधीक्षक ईशू सिंधू यांनी वरिष्ठ अधिकाऱ्यांसह जाणता राजा मैदानाची बुधवारी पाहणी केली.