अकोला, बुलडाण्यात सर्वदूर पाऊस

संग्रहित छायाचित्र
संग्रहित छायाचित्र

अकोला   ः वऱ्हाडातील अकोला, बुलडाणा या जिल्ह्यामध्ये शुक्रवारी (ता. २१) सायंकाळपासून रिमझिम पावसाला सुरवात झाली. अनेक ठिकाणी मध्यम स्वरूपाचा पाऊस झाला. अकोला, बुलडाण्यात पावसाचा जोर अधिक होता. मात्र वाशीममध्ये रिमझिम स्वरूपाचा पाऊस झाला.  

अकोल्यात शनिवारी (ता. २२) सकाळी आठ वाजेपर्यंत सरासरी ४४.३, बुलडाणा जिल्ह्यात ३१.६, तर वाशीममध्ये अवघ्या १.३ मिमी पावसाची नोंद झाली. या भागात २२ ऑगस्टनंतर प्रथमच पाऊस झाला आहे. जवळपास महिनाभराच्या अंतराने हा सर्वदूर पाऊस नोंदविला गेला. जिल्ह्यात अकोला, अकोट, तेल्हारा, बाळापूर, मूर्तिजापूर या चार तालुक्‍यांत ५० तर बार्शीटाकळी, पातूर या तालुक्‍यांत २५ मिमीपर्यंत पाऊस झाला.

बुलडाणा जिल्ह्यात घाटाखाली मलकापूर तालुक्‍यात सर्वाधिक ६०.४ मिमी पावसाची नोंद झाली. याशिवाय संग्रामपूर येथे ५८.२, जळगाव जामोद येथे ५७.८, नांदुरा येथे ५१.४ मिमी पावसाची नोंद झाली. याशिवाय बुलडाणा येथे ३३.१, चिखली येथे २१.५, देऊळगाव राजा येथे ५.४, सिंदखेडराजा येथे ११.७, लोणार येथे १४.५, मेहकर येथे २०.१, खामगाव येथे १५.१, शेगाव येथे २४.८, मोताळा येथे ३७.१ मिमी पावसाची नोंद झाली. बुलडाणा जिल्ह्यात पिकांची दयनीय स्थिती झाली होती. या पावसामुळे कपाशी, तूर, ज्वारी या पिकांना फायदा होणार आहे. शिवाय पुढील महिन्यापासून सुरू होणाऱ्या रब्बीसाठीसुद्धा शेतकऱ्यांना दिलासा मिळणार आहे. पावसाने सर्वच पिकांना जीवदान दिले आहे.

वाशीम जिल्ह्यात मात्र फारसा पाऊस झालेला नाही. मंगरूळपीर, मानोरा या दोनच तालुक्‍यांत हलक्‍या स्वरूपात पाऊस झाला. उर्वरित ठिकाणी पावसाची नोंदसुद्धा होऊ शकलेली नाही. वाशीममध्येही सोयाबीन, कपाशी, तूर या पिकांना पावसाची मोठी गरज आहे. २५ दिवसांपेक्षा अधिक काळापासून पाऊस नसल्याने सोयाबीनला याची सर्वाधिक झळ सहन करावी लागली. सोयाबीनचे उत्पादन किमान ४० ते ५० टक्‍क्‍यांपर्यंत घटू शकते असे शेतकरी सांगत आहे. शेंगामध्ये दाणे भरण्याच्या स्थितीत पावसाची नितांत गरज होती. याचवेळी पाऊस झाला नाही. आता पाऊस येऊनही सोयाबीनला त्याचा तितकासा फायदा होण्याची शक्‍यता नाही.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com