अंकुशनगर परिसरात पावसाचा दणका 

अंकूशनगर, जि. जालना: एकिकडे कोरोनाचे सावट असताना पुर्वमोसमी पावसाचा दणका शेतकरी वर्गाला चांगलाच बसला आहे. शनिवारी (ता. २८) अंकुशनगर परिसरात पावसाने जोरदार हजेरी लावली.   परिसरात मार्च महिन्यात चार वेळेस पावसाचा फटका बसला असून यामध्ये गहू हरभरा, ज्वारी रब्बी पिकाचे अतोनात नुकसान झाले आहे. त्याच बरोबर फळबागांचेही मोठ्या प्रमाणात नुकसान झाले. याशिवाय गहू काढणीला मजूर मिळेना, काढून ठेवलेल्या गव्हाला मळणी यंत्र व हार्वेस्टर मिळत नसल्याने गहू तसाच उघड्यावर भिजत पडला आहे. या महिन्यात वडीगोद्री येथे दोन वेळस अवकाळी पावसामुळे आलेल्या टरबूजाला ही मोठ्या प्रमाणात  फटका बसला आहे. कांदा पिकांचेही नुकसान झाले आहे. 

अनेक शेतकऱ्यांनी घरात भाव वाढीच्या आशेने कापूस घरात साठवून ठेवला आहे. त्याला व्यापारी मिळेना व भाव ही नाही त्यात महसूल विभाग हे कोरोना प्रतिबंधक उपाय योजना करण्यात व्यस्त असतांना पिकांच्या नुकसानीचे पंचनामे होतील का नाही हा प्रश्न उपस्थित झाला आहे.