पावसाचा जोर ओसरला

हवामान अंदाज
हवामान अंदाज

पुणे : राज्याच्या काही भागात दाणादाण उडवून देणारा पाऊस आेसरण्याचा अंदाज आहे. आजपासून (ता. २८) कोकण, मध्य महाराष्ट्रात सकाळपासून उन्हाचा चटका, उकाडा, तर दुपारनंतर ढग जमा होऊन मेघगर्जना विजांसह हलक्या पावसाची शक्यता आहे. धुळे, नंदूबार, नाशिक, नगर, पुणे जिल्ह्यात तुरळक ठिकाणी वादळी वाऱ्यासह पावसाचा इशारा हवामान विभागाने दिला आहे.  मॉन्सूनचा आस निवळून गेला असला तरी अद्याप संपूर्ण देशात मॉन्सूनचे अस्तित्व आहे. मॉन्सून सक्रिय असल्याने दोन-तीन दिवस पावसाचा जोर वाढला. पुण्यासह, जळगाव, सोलापूर, औरंगाबाद, नाशिक, वाशीम मध्ये काही ठिकाणी जोरदार पावसाने दणका दिल्याने पूरस्थिती निर्माण झाली. धरण क्षेत्रातील पावसामुळे अनेक धरणांतून विसर्ग सुरू करावा लागला. शुक्रवारी सकाळपर्यंतच्या २४ तासांमध्ये रायगड जिल्ह्यातील मुरूड येथे सर्वाधिक १४० मिलिमीटर पावसाची नोंद झाली. कोकण, मध्य महाराष्ट्र, मराठवाडा आणि विदर्भातही तुरळक ठिकाणी मेघगर्जनेसह हलक्या ते मध्यम पावसाने हजेरी लावली. शुक्रवारी दिवसभर मात्र पावसाने काहीशी उसंत घेतली होती.    उत्तर अरबी समुद्र आणि परिसरावर असलेल्या चक्राकार वाऱ्यांमुळे आज (ता. २८) कमी दाबाचे क्षेत्र तयार होण्याचे आणि त्याची तीव्रता वाढण्याचे संकेत आहेत. तर दुसरीकडे बंगालच्या उपसागरातही आणखी एक कमी दाबाचे क्षेत्र तयार होण्याची शक्यता आहे. या दोन्ही प्रणाली पूरक ठरल्याने पूर्व आणि ईशान्य भारतात पावसाचा जोर वाढणार आहे. महाराष्ट्रात मात्र दोन-तीन दिवस पाऊस कमी होणार असून, दुपारनंतर मेघगर्जनेसह पावसाची शक्यता आहे. शुक्रवारी (ता.२७) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस, मिलिमीटरमध्ये (स्त्रोत - हवामान विभाग) : कोकण : कुलाबा ५१, जव्हार ३९, मोखेडा ३५, अलिबाग ६२, खालापूर ६६, माणगाव ५०, मुरूड १४०, श्रीवर्धन ६५, सुधागडपाली ७६, उरण ६१, लांजा ३७, राजापूर ४४, संगमेश्वर ३५, देवगड ५७, दोडामार्ग ३३, सावंतवाडी ४६, वैभववाडी ३३, कल्याण ३५. मध्य महाराष्ट्र : अंमळनेर ३२, भुसावळ ३०, यावल ३२, चंदगड ३३, चंदगड ३७, दिंडोरी ३३, इगतपुरी ६०, नाशिक ३३, पेठ ४४, सुरगाणा ३२, जुन्नर ४३, मंगळवेढा ३८. मराठवाडा : गंगापूर ३२, कन्नड २९, कळमनुरी २६, रेणापूर ४०, भोकर ४२, हादगाव २९, हिमायतनगर ३८, मुखेड ३०, नायगाव खैरगाव ४२, नांदेड ४४, उमरी २६, पूर्णा ४४. विदर्भ : बटकुली ३२, दर्यापूर ३०, नांदगाव काझी २४, परतवाडा २७, खारंघा २१, मनोरा २५, पुसद २२.  

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com