कमी दाबाचे क्षेत्र विरताच जोर ओसरला

पुणे : बंगालच्या उपसागरात किनारपट्टीलगत असलेले कमी दाबाचे क्षेत्र रविवारी (ता. २८) निवळले. परिणामी सकाळपासून राज्यातील पावसाचा जोरही ओसरला. काही ठिकाणी पावसाच्या हलक्या ते मध्यम सरी येत होत्या. तर अनेक ठिकाणी पावसाने उघडीप दिल्याचे चित्र होते. सकाळपर्यंतच्या २४ तासांमध्ये कोकण, घाटमाथा आणि मध्य महाराष्ट्रात मुसळधार पाऊस पडला. घाटमाथ्यावरील ताम्हिणी येथे सर्वाधिक ३२० मिलिमीटर, तर अनेक ठिकाणी २०० मिलिमीटरपेक्षा अधिक पावसाची नोंद झाली.  नाशिक जिल्ह्यातील इगतपुरी, त्र्यंबकेश्‍वर तसेच नाशिक शहर व परिसरात झालेल्या दमदार पावसामुळे धारणसाठ्यात लक्षणीय वाढ झाली आहे. दारणा धरणाच्या स्वयंचलित दरवाजांमधून पाण्याचा विसर्ग सुरू असून, भावली धरण ओव्हरफ्लो झाले आहे. त्र्यंबकेश्‍वर शहरात पुन्हा पूरस्थिती निर्माण झाली होती. मुकणे धरणाच्या लाभक्षेत्रातील ओंडओहोळ नदीलाही पूर आला. नगर जिल्ह्याच्या अनेक भागांत अजून पावसाचा जोर नाही. मात्र भंडारदरा आणि मुळा धरणाच्या पाणलोटात पाऊस टिकून आहे. त्यामुळे मुळा व भंडारदरा धरणात दोन-तीन दिवसांपासून पाण्याची बऱ्यापैकी आवक होत आहे.  कोल्हापूर जिल्ह्यात रविवारी दुपारपर्यंत पावसाने काहीशी विश्रांती घेतली होती. पश्‍चिम भागात मात्र हलका ते मध्यम स्वरूपाचा पाऊस सुरूच होता. जोरदार पावसामुळे पुन्हा एकदा नद्यांचे पाणी दुथडी भरून वाहू लागले आहे. पावसाचा जोर असाच राहिल्यास बहुतांशी नद्यांचे पाणी पात्राबाहेर पडण्याची शक्‍यता आहे. रत्नागिरी जिल्ह्यातील मुसळधार पावसामुळे मंडणगड तालुक्यातील लाटवण, पिंपळगाव, चिंचघर नदीकिनारा जलमय झाला होता. भारजा नदी तुडुंब भरून आपले पात्र सोडून वाहू लागल्याने शेकडो एकर भातशेती पूर्णपणे पाण्याखाली गेली आहे. त्यामुळे भात शेतीचे नुकसान होणार असून, शेतकरी चिंतातूर झाला आहे.  पुणे जिल्ह्यातील पश्‍चिम भागात असलेल्या तालुक्यांमध्ये पावसाने दमदार हजेरी लावली आहे. रविवारी (ता. २८) सकाळपर्यंतच्या २४ तासांमध्ये मुळशी, भोर, मावळ, वेल्हा, जुन्नर, खेड तालुक्यांतील अनेक मंडळांमध्ये १०० मिलिमीटरपेक्षा अधिक पावसाची नोंद झाली आहे. धरणांच्या पाणलोटातील पावसामुळे नद्यांना पूर आले असून, धरणे भरू लागली आहेत. नांदेड, परभणी, हिंगोली जिल्ह्यांतील १४५ मंडळांमध्ये हलका ते मध्यम पाऊस झाला. या तीन जिल्ह्यांतील अनेक भागांत रविवारी दुपारपर्यंत अधून मधून रिमझिम पावसाच्या सरी येत होत्या. ओढे, नाले, नद्या प्रवाहित होण्यासाठी मोठ्या पावसाची गरज आहे.  रविवारी (ता. २८) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस, मिलिमीटरमध्ये (स्रोत - हवामान विभाग) :