पुणे जिल्ह्यातील कोरडवाहू पट्ट्यात दमदार पाऊस

पुणे   : दुष्काळाने होरपळत असलेल्या जिल्ह्यातील ग्रामीण भागात मॉन्सूनचे जोरदार आगमन झाले आहे. कोरडवाहू पट्ट्यातील बारामती, शिरूर, इंदापूर, दौंडसह, आंबेगाव, खेड, जुन्नर तालुक्यात रविवारी (ता. २३) दुपारनंतर दमदार पावसाने हजेरी लावली. या पावसानंतर वाफसा मिळताच खरिपाच्या पेरण्यांना वेग येणार आहे.  

शिरूर तालुक्यातील न्हावरे परिसरात एक ते दीड तास दमदार पाऊस झाला. निर्वी येथे कांदा झाकण्यासाठी गेलेल्या अक्षय ज्ञानदेव पवार (वय २०) या युवकाचा वीज पडून मृत्यू झाला. बारामती तालुक्यातील उंडवडी सुपे परिसरात पावसाने दमदार हजेरी लावली. पावसाच्या साचलेल्या पाण्याचे शेतकऱ्यांनी नारळ वाहून पूजन केले. ग्रामस्थांनी श्रमदानातून खोदलेले सलग समतल चर भरून वाहू लागले. सोमेश्वरनगर परिसरात सायंकाळी पावसाने जोरदार हजेरी लावली. पहिल्याच पावसाने शेतात पाणी साचल्याने बळिराजा सुखावला आहे. हा पाऊस खरिपाच्या पेरण्यांसाठी उपयुक्त ठरणार आहे.

शेतात उभी असलेली ऊस, टोमॅटो, भाजीपाला व चारा पिके जळूनच चालली होती. या पावसाने या पिकांना जीवदान मिळाले आहे. इंदापूर तालुक्यातील पश्‍चिम भागामधील लासुर्णे, अंथुर्णे, भरणेवाडी, वालचंदनगर, कळंब, निमसाखर, निरवांगी परिसरांमध्ये वादळी वाऱ्यासह झालेल्या पावसाने शेतकऱ्यांचे नुकसान झाले. भरणेवाडीमधील अमर बोराटे यांच्या शेतामधील पाऊण एकर क्षेत्रात तोंडल्याच्या बागेमधील लाकडाचा माळा कोसळून भुईसपाट झाला.

खेड तालुक्याच्या पश्चिम पट्ट्यातील चास, कमान व मोहकल परिसरांत मुसळधार पावसाने शेतजमिनींसह शेतीमालाचे मोठे नुकसान झाले, अनेक ठिकाणी शेतांचे बांध फुटून शेतातील माती वाहून गेली, विहिरीसह विद्युत मोटर गाडली गेली, आखरवाडी, चास, कमान, मोहकल व कान्हेवाडीच्या डोंगराळ भागात मुसळधार पाऊस पडला. भाताच्या लागवडीसाठी तयार करण्यात येत असलेली रोपे या मातीमध्ये गाडली गेली. सोयाबीनच्या पेरण्या झालेल्या शेतांमध्ये पाणी साचल्याने बियाणे सडण्याची भीती व्यक्त होत आहे. आंबेगाव तालुक्‍याच्या आदिवासी भागात वळवाच्या पावसावर भातरोपे तरारली असून, या रोपांना आता पावसाची नितांत गरज आहे.