पावसाची उघडीप राहण्याची शक्यता

पुणे : माॅन्सूनचे मंदावलेले प्रवाह, उत्तरेकडे सरकलेला माॅन्सूनचा आस, यामुळे राज्यात पावसाने उघडीप दिली आहे. शनिवारपर्यंत (ता. ८) राज्याच्या बहुतांशी भागांत पावसाची उघडीप राहण्याची शक्यता आहे. तर कोकणासह तुरळक ठिकाणी हलक्या पावसाचा अंदाज हवामान विभागाने वर्तविला आहे.  उत्तर बंगालच्या उपसागरात असलेल्या चक्राकार वाऱ्यांच्या स्थितीमुळे या भागात गुरुवारपर्यंत (ता. ६) कमी दाबाचे क्षेत्र तयार होणार असून, त्याच्या प्रभावामुळे आेडिशासह बंगाल, झारखंड, छत्तीसगड व मध्य भारतात पुढील तीन दिवस पाऊस वाढणार आहे. तर मॉन्सूनचे प्रवाह कमकुवत राहणार असल्याने दक्षिण भारत, महाराष्ट्रातही पावसाचे प्रमाण कमी राहण्याचा अंदाज आहे. मंगळवारी (ता. ४) सकाळपर्यंतच्या २४ तासांमध्ये राज्यात तुरळक ठिकाणी हलक्या ते मध्यम स्वरूपाचा पाऊस पडला.   मंगळवारी (ता. ४) सकाळपर्यंतच्या २४ तासांमध्ये पडलेला पाऊस (स्राेत - कृषी विभाग) : कोकण : न्याहडी ३३, रामपूर ३०, सावर्डे ४६, कळकवणे ४५, शिरगांव ३७, पाटपन्हाले ३०, अबलोली ३०, कडवी ३५, मुरडव ३०, फणसावणे ३८, अंगवली ४४, देवरुख ३४, अंबोली ३३. मध्य महाराष्ट्र : बाऱ्हे २२, मानखेड २४, सुरगाणा ३०, नाणशी २१, इगतपुरी २६, घोटी २१, पेठ २२, मुठे २७, काले २५, बामणोली २२, महाबळेश्‍वर २८, तापोळा ५८, लामज ६५, आंबा ३१. मराठवाडा : झरी १०, सालगारा १२, मुलाज १०, मोघाळी १५, मातूळ ११, मुगट १२. विदर्भ : माटरगाव १०, दाताळा ११, धरणगाव ११, जांभूळधाबा २०, पिंपळगाव १०, मुंगळा २०, वार्थी १०, सिरोंचा ३२.