जळगाव, धुळ्यात पुन्हा पाऊस

जळगाव  ः खानदेशात धुळे व जळगावात मंगळवारी (ता. २४) अनेक भागांत हलका ते मध्यम स्वरूपाचा पाऊस झाला. जळगाव जिल्ह्यात चोपडा, यावल, धरणगाव, धुळ्यातील शिंदखेडा व शिरपूर भागांत पावसाने हजेरी लावली.  कुठेही अतिवृष्टी झालेली नाही. परंतु, काही भागांत सुसाट वाऱ्यासह पाऊस झाल्याने ज्वारी, कापूस, बाजरी पिकाचे अंशतः नुकसान झाले आहे. सध्या उडीद कापणी, कापूस वेचणी आणि आंतरमशागत, मशागतीची कामे सुरू आहेत. वाफसा कमी अधिक असतानादेखील शेतकरी कामे उरकून घेत आहेत. परंतु, पावसामुळे व्यत्यय येत असल्याने शेतकऱ्यांच्या कामांना फटका बसत आहे. जळगाव जिल्ह्यातील वाघूर, गिरणासह तोंडापूर, अंजनी, अग्नावती, हिवरा, बोरी, अभोरा, मंगरूळ, सुकी आदी प्रकल्प १०० टक्के भरले आहेत. तर मोर, गूळ प्रकल्पाचे दरवाजेदेखील उघडे आहेत. त्यातील विसर्ग मात्र मंगळवारी कमी करण्यात आला. धुळ्यातील पांझरा, जामखेडी, बुराई, अनेर प्रकल्पांतील आवकही कमी झाल्याने त्यातील विसर्ग कमी केला. गिरणा धरणातून सोमवारी (ता. २३) सुमारे सात हजार क्‍युसेक पाण्याचा विसर्ग सुरू होता. हा विसर्ग मंगळवारी सायंकाळी कमी झाल्याचे सांगण्यात आले.  गिरणा धरणातील आवक सोमवारी नाशिकमध्ये जोरदार पाऊस झाल्याने वाढली होती. या धरणात चणकापूर, हरणबारी प्रकल्पांतून पाणी येत असल्याचे सांगण्यात आले.  गेल्या २४ तासांतील पाऊस (मिलिमीटरमध्ये) ः जळगाव ः चोपडा १४, यावल ६, धरणगाव ६. धुळे ः शिरपूर ११, शिंदखेडा ७. नंदुरबार ः धडगाव २४, अक्कलकुवा २७.