कोकणात पावसाचा जोर; मध्य महाराष्ट्रात हलक्या सरी

पुणे: ‘वायू’ चक्रीवादळाच्या प्रभावामुळे कोकणात पावसाने जोर धरला आहे, तर मध्य महाराष्ट्रातही तुरळक ठिकाणी हलक्या सरींनी हजेरी लावली आहे. आज (ता. १३) मुंबईसह कोकणात मुसळधार पाऊस, तर मध्य महाराष्ट्रात हलक्या सरींची शक्यता आहे; तर विदर्भ आणि मराठवाड्यात असलेली उष्णतेची लाट कायम राहण्याचा इशारा हवामान विभागाने दिला आहे.  अरबी समुद्रातील वायू वादळामुळे महाराष्ट्र आणि गुजरातच्या किनाऱ्यालगत ढगांची दाटी झाली आहे. खवळलेल्या समुद्रामुळे सिंधुदुर्ग, रत्नागिरीच्या किनाऱ्याला तडाखा बसला आहे. मंगळवारी रात्रीपासूनच सिंधुदुर्ग जिल्ह्यात सर्वत्र वाऱ्यांसह पावसाचा जोर वाढला आहे. समुद्राच्या उंच लाटा उसळत असून, वाऱ्याचा वेग प्रचंड असल्यामुळे झाडे उन्मळून पडली आहेत. घरांमध्ये समुद्राचे पाणी घुसले, त्यामुळे तेथील रहिवाशांना स्थंलातरित करावे लागले. बहुतांशी भागात पेरणीयोग्य पाऊस झाल्यामुळे शेतकऱ्यांनी पेरण्यांना सुरवात केली. रत्नागिरी जिल्ह्यात दापोली, गुहागर, संगमेश्वर, रत्नागिरी, लांजा, राजापूर तालुक्यात पाऊस सुरू होता. बुधवारी सकाळपासून मुंबईसह कोकणात पाऊस वाढला होता.  वादळामुळे आज (ता. १३) कोकणातील रायगड, रत्नागिरी, सिंधुदुर्ग जिल्ह्यांत तुरळक ठिकाणी अतिवृष्टीची शक्यता आहे. पालघर, ठाणे, मुंबईतही पावसाचा जोर वाढणार आहे. मध्य महाराष्ट्रातील धुळे, नंदुरबार, जळगावात वादळी पावसाचा अंदाज असून, कोल्हापूर आणि साताऱ्यातही हलका पाऊस शक्य आहे. विदर्भात सर्वत्र उष्णतेची तीव्र लाट असून, बुधवारी (ता. १२) सकाळपर्यंतच्या २४ तासांमध्ये चंद्रपूर येथे ४६.२ अंश सेल्सिअस तापमानाची नोंद झाली. मराठवाडा आणि उत्तर महाराष्ट्रातही तुरळक ठिकाणी उष्ण लाट होती. आज (ता. १३) विदर्भ, मराठवाड्यात अनेक ठिकाणी, तर उत्तर महाराष्ट्रात तुरळक ठिकाणी उष्ण लाट येण्याची शक्यता आहे.     बुधवारी (ता. १२) सकाळी साडेआठ वाजेपर्यंतच्या २४ तासांत राज्यातील विविध ठिकाणचे कमाल तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे ३६.५ (४.३), जळगाव ४३.४ (४.४), कोल्हापूर ३३.१ (२.६), महाबळेश्वर २७.४ (४.१), मालेगाव ४१.८ (५.४), नाशिक ३७.० (३.०), सांगली ३३.४ (१.५), सातारा ३५.२ (४.३), सोलापूर ३७.६ (२.१), अलिबाग ३५.८ (३.८), डहाणू ३६.५ (३.१), सांताक्रूझ ३४.६ (२.०), रत्नागिरी ३५.८ (५.१), औरंगाबाद ३८.६ (३.३), परभणी ४२.२ (४.४), नांदेड ४२.० (४.४), अकोला ४४.५ (६.१), अमरावती ४४.२ (५.८), बुलडाणा ४१.२ (६.२), ब्रह्मपुरी ४५.३ (६.६), चंद्रपूर ४६.२ (७.१), गोंदिया ४६.० (६.५), नागपूर ४४.९ (५.८), वर्धा ४५.० (६.८), यवतमाळ ४४.० (५.९).  बुधवारी (ता. १२) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस (मिलिमीटरमध्ये) :  कोकण : भिरा, माथेरान प्रत्येकी ४०, राजापूर, कुलाबा प्रत्येकी ३०, खालापूर, रोहा, सुधागड, पाली प्रत्येकी १०.  मध्य महाराष्ट्र : सिन्नर ३०, इगतपुरी, येवला, जावळी, मेढा प्रत्येकी २०, महाबळेश्वर, जामखेड, हर्सुल, त्रिंबकेश्वर, दहिवडी, कोरेगाव, गगनबावडा प्रत्येकी १०.  मराठवाडा : निलंगा, पाटोदा प्रत्येकी ३०, वैजापूर, गंगाखेड प्रत्येकी २०, कळमनुरी, सोनपेठ प्रत्येकी १०.