साताऱ्याच्या अनेक भागांत संततधार

सातारा : जिल्ह्याच्या पश्चिम भागात शुक्रवारी (ता. २६) सर्वत्र संततधार पाऊस झाला. माण, खटाव, फलटण या दुष्काळी तालुक्यात कमी-अधिक स्वरूपात त्याने हजेरी लावली. जिल्ह्यात शनिवारपर्यंतच्या (ता. २७) २४ तासांत एकूण सरासरी ६३.३७ मिलिमीटर पावसाची नोंद झाली.

पिकांना पाण्याची गरज निर्माण झाली असतानाच शुक्रवारी संततधार पाऊस सुरू झाला. त्यामुळे शेतकऱ्यांना दिलासा मिळाला. जिल्ह्याच्या पश्चिम भागात संततधार पाऊस सुरू आहे. नद्या, नाले, ओढे दुधडी भरून वाहू लागले आहेत. अनेक शेतात पाणी साचले आहे. पावसाअभावी संथ झालेल्या भात लावणीस वेग येण्यास या पावसाची मदत होणार आहे. महाबळेश्वर, पाटण, जावळी, सातारा, वाई, कराड या तालुक्यांत जोरदार पाऊस सुरू आहे. या सर्व तालुक्यांत ५० मिलिमीटरपेक्षा जास्त पाऊस झाला.

कोरेगाव, खंडाळा, खटाव तालुक्यात अनेक ठिकाणी दमदार पाऊस झाला. तसेच, माण व फलटण तालुक्यातही हलका ते मध्यम स्वरूपाचा पाऊस झाला. एकूणच, शुक्रवारी झालेला पाऊस शेतकऱ्यांना दिलासा देणारा ठरला. त्यामुळे पिकांची वाढ होण्यास मदत होणार आहे. कोयना धरण क्षेत्रातही दमदार पाऊस सुरू आहे.  या धरण क्षेत्रातील कोयना २३७, नवजा २७१, महाबळेश्वर भागात २०४ मिलिमीटर पाऊस झाला.

कोयना धरणाची पाणीपातळी २११७.०१ फूट झाली. ५८.६७ टीएमसी एवढा पाणीसाठा त्यात झाला आहे. इतर धरणाच्या पाणलोट क्षेत्रात पाऊस सुरू असल्याने पाणीसाठ्यात वाढ होऊ लागली आहे. शनिवारीही दुपारपर्यंत संततधार पाऊस सुरू असल्याने शेतातील कामे ठप्प झाली.  

तालुकानिहाय पाऊस (मिमी)