पावसाची लातूर, उस्मानाबादकडे पाठ

औरंगाबाद : मराठवाड्यात शुक्रवारी (ता. ९) सकाळपर्यंतच्या २४ तासांत लातूर, उस्मानाबाद जिल्ह्यांकडे पावसाने पाठ फिरविली. औरंगाबाद, जालन्यामध्ये जवळपास सर्वच मंडळांत तुरळक ते हलका पाऊस झाला. बीड जिल्ह्यातील वडवणी, माजलगाव व गेवराई तालुक्‍यातील केवळ १५ मंडळांत पावसाने तुरळक हजेरी लावली.  

मराठवाड्यावर पावसाची नाराजी कायम आहे. औरंगाबाद जिल्ह्यात सर्व ६५ मंडळांत पावसाची तुरळक ते हलकी हजेरी लागली. औरंगाबाद तालुक्‍यातील १० मंडळांत २ ते १३ मिलिमीटर, फुलंब्री तालुक्‍यातील ४ मंडळांत ४ ते १२ मिलिमीटर, पैठण तालुक्‍यातील १० मंडळांत ६ ते १२ मिलिमीटर पाऊस झाला. सिल्लोड तालुक्‍यातील ८ मंडळांत बऱ्यापैकी पाऊस झाला.

या आठही मंडळांत १२ ते १८ मिलिमीटर, सोयगाव तालुक्‍यातील ३ मंडळांत ५ ते १७, वैजापूर तालुक्‍यातील १० मंडळांत ४ ते १७, गंगापूर तालुक्‍यातील ९ मंडळांत ५ ते १२, कन्नड तालुक्‍यातील ८ मंडळांत ८ ते १६, तर खुल्ताबाद तालुक्‍यातील तीन मंडळांत ४ ते ११ मिलिमीटर पाऊस झाला. 

जालना जिल्ह्यातील ४९ मंडळांत झालेल्या पावसाची हजेरी तुरळक ते हलकीच राहिली. जालना तालुक्‍यातील ८ मंडळांत ४ ते १३ मिलिमीटर, बदनापूर तालुक्‍यातील ५ मंडळात ६ ते २०,भोकरदन तालुक्‍यातील ८ मंडळांत ५ ते २३, जाफराबाद तालुक्‍यातील ४ मंडळांत ७ ते १७, परतूर तालुक्‍यातील ५ मंडळांत ६ ते १७, मंठा तालुक्‍यातील ४ मंडळांत ४ ते १३, अंबड तालुक्‍यातील ७ मंडळांत ९ ते १३, घनसावंगी तालुक्‍यातील ७ मंडळांत ७ ते १० मिलिमीटर पावसाची नोंद झाली. 

बीड जिल्ह्यातील गेवराई, बीड, वडवणी तालुक्‍यातील १५ मंडळांत १ ते ६ मिलिमीटर पाऊस झाला. लातूर जिल्ह्यातील निलंगा तालुक्‍यांतर्गत अंबूलगा मंडळांत ३ मिलिमीटर पाऊस झाला. इतर एकाही मंडळात पाऊस झाला नाही. उस्मानाबाद जिल्ह्यात तर एकाही मंडळात पावसाची नोंद झाली नाही.