ऊन-सावल्यांच्या खेळात पावसाची दडी; कोकणात तुरळक ठिकाणी हजेरी

पुणे : मॉन्सून सक्रिय नसल्याने राज्याच्या बहुतांश भागात पावसाने उघडीप दिली आहे. कोकण आणि घटमाथ्यावर तुरळक ठिकाणी जोरदार पाऊस पडत आहेत. उर्वरित राज्यात ऊन-सावल्यांच्या खेळात एखाद्‌ दुसऱ्या सरीचा अपवाद वगळता पावसाने दडी मारल्याचे चित्र आहे. आज (ता. १५) कोकण वगळता उर्वरित राज्यात मुख्यत: पावसाची उघडीप राहण्याची शक्यता हवामान विभागाने वर्तविली आहे.   काेकण, घाटमाथ्यावर पडणाऱ्या पावसाचा जोर ओसरल्याने नद्यांचा पूर आटला आहे. धरणांमधील पाण्याचा येवाही कमी झाला आहे. मध्य महाराष्ट्रातही पाऊस थांबला असून, मराठवाडा, विदर्भात पावसाची ओढ कायम आहे. गुरुवारपर्यंत (ता. १८) पावसाची उघडीप कायम राहणार आहे. याच दरम्यान बंगालच्या उपसागरात कमी दाबाचे क्षेत्र तयार होण्याचे संकेत आहेत. हे क्षेत्र पोषक ठरल्याने शुक्रवारपासून राज्यात पाऊस पुन्हा जोर धरण्याची शक्यता वर्तविण्यात आली आहे. रविवारी (ता. १४) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस, मिलिमीटरमध्ये (स्रोत - हवामान विभाग) :  कोकण : माथेरान ७०, पनवेल, राजापूर, संगमेश्‍वर, सावंतवाडी प्रत्येकी ६०, लांजा, शहापूर, वसई, मुरबाड प्रत्येकी ५०, अंबरनाथ, कणकवली, उल्हासनगर, पालघर, ठाणे, वाडा प्रत्येकी ४०, चिपळूण, कुडाळ, कर्जत, विक्रमगड, पेण, देवगड, वैभववाडी, भिरा, खेड प्रत्येकी ३०.  मध्य महाराष्ट्र : गगणबाडा ६०, इगतपुरी ५०, शाहूवाडी, त्रिंबकेश्‍वर, लोणावळा, हर्सूल, पारोळा, पन्हाळा, राधानगरी प्रत्येकी २०. घाटमाथा : ताम्हिणी ६०, कोयना पोफळी, शिरगाव प्रत्येकी ५०, डुंगरवाडी, दावडी, आंबोणे प्रत्येकी ४०, भिवापुरी, ठाकूरवाडी, वाणगाव, खोपोली प्रत्येकी ३०.