शुक्रवारपासून पावसाचा अंदाज

पुणे: बंगालच्या उपसागरात उद्या (ता. १८) कमी दाब क्षेत्र तयार होण्याचे संकेत आहेत. ही प्रणाली अनुकूल ठरण्याची शक्यता असल्याने राज्यात शुक्रवारपासून (ता. २१) पावसाचा अंदाज वर्तविण्यात आला आहे. सध्या राज्यात पावसाने उघडीप दिली असून, तापमानातही वाढ झाली आहे. रविवारी (ता. १६) सकाळपासून राज्यात ढगाळ हवामान असल्याने उकाड्यात वाढ झाली होती.  बर्मा देशाच्या दक्षिण भागात असलेल्या ‘मर्तबान’च्या आखातमध्ये समुद्र सपाटीपासून ५.८ किलोमीटर उंचीवरील चक्राकार वाऱ्यांची स्थिती पूर्वमध्य बंगालच्या उपसागराकडे सरकत आहे. चक्राकार वाहणाऱ्या या वाऱ्यांमुळे उद्या (ता. १८) कमी दाबाचे क्षेत्र तयार होण्याचे संकेत आहेत. या प्रणालीमुळे बंगालच्या उपसागरात अंदमान निकोबार बेटांलगतच्या समुद्रात तीन ते चार दिवस प्रतिकूल सागरी स्थिती राहणार आहे.  आजपासून (ता. १७) गुरुवारपर्यंत (ता. २०) ओडिशा अाणि पश्‍चिम बंगालच्या किनाऱ्यालगतच्या समुद्रात मासेमारीसाठी न जाण्याचा इशारा देण्यात आला आहे. हे कमी दाबाचे क्षेत्र ओडिशा, छत्तीसगड, मध्य प्रदेशावरून सरकणार असल्याने २१ ते २४ सप्टेंबर दरम्यान महाराष्ट्रासह मध्य आणि उत्तर भारतातील राज्यात पावसाचा जोर वाढण्याची शक्यता वर्तविण्यात आली आहे. तर गुरुवारपर्यंत (ता. २०) राज्यात तुरळक ठिकाणी हलक्या पावसाचा अंदाज आहे. राज्यातच्या कमाल तापमानात वाढ झाली असून, रविवारी असलेल्या ढगाळ हवामानामुळे तापमानात काहीशी घट होणार आहे.  रविवारी (ता. १६) सकाळी साडेआठ वाजेपर्यंतच्या २४ तासांमध्ये सोलापूर येथे उच्चांकी ३६.२ अंश सेल्सिअस तापमानाची नोंद झाली. राज्यातील विविध ठिकाणचे कमाल, कसांत किमान तापमान (अंश सेल्सिअसमध्ये) : पुणे ३०.६, कोल्हापूर ३१.६, महाबळेश्‍वर २१.८, मालेगाव ३३.२, नाशिक ३१.३, सांगली ३३.४, सातारा ३१.१, सोलापूर ३६.२, सांताक्रुज ३२.१, अलिबाग ३१.८, रत्नागिरी ३१.६, डहाणू ३१.६, आैरंगाबाद ३१.०, परभणी ३३.६, नांदेड ३१.०, अकोला ३४.७, अमरावती ३३.२, बुलडाणा २८.६, चंद्रपूर ३५.६, गोंदिया ३३.०, नागपूर ३४.१, वर्धा ३५.०, यवतमाळ ३३.५.