कोकण, मध्य महाराष्ट्रात आज पावसाची शक्यता

पुणे : राज्याच्या अनेक भागांत पावसाने उघडीप दिली आहे. मंगळवारी (ता. २३) सकाळपर्यंतच्या २४ तासांमध्ये दक्षिण कोकणात पावसाने जोरदार हजेरी लावली, रत्नागिरी येथे २८०, तर राजापूर येथे २५० मिलिमीटर पावसाची नोंद झाली. उर्वरित राज्यात उन्हाच्या चटक्याबरोबरच उकाड्यातही वाढ झाली आहे.  काही ठिकाणी ऊन सावल्यांच्या खेळात अधूनमधून काही सरी येत आहेत. आज (ता. २४) कोकण, मध्य महाराष्ट्रात पावसाची शक्यता आहे. तुरळक ठिकाणी मुसळधार पावसाचा अंदाजही हवामान विभागाने वर्तविला आहे.  काही दिवसांच्या विश्रांतीनंतर रत्नागिरी, सिंधुदुर्ग जिल्ह्यांत काही मुसळधार पाऊस पडला. रत्नागिरी तालुक्यातील केळेये-मजगाव पुलावरून पाणी गेल्यामुळे वाहतूक कोंडी झाली. धामणसे-ओरी आणि केळ्ये येथे रस्ता खचल्याने वाहतूक खंडित झाली आहे. हवामान विभागाकडील नोंदीनुसार रत्नागिरीत २८० मिलिमीटर तर महसूल विभागाकडील नोंदीनुसार रत्नागिरी २१२ मिलिमीटर पाऊस पडला.  राजापूर येथे २५० मिलिमीटरची नोंद झाली. पावसामुळे सोमवारी रात्री मिरजोळे-पाटीलवाडी येथे पाणी भरले, तर शिळकडे जाणार मार्गही बंद झाला. पावसामुळे केळेये येथे नदीचे पाणी पुलावरून वाहत होते. भांडरपुळे येथेही पाणी भरल्याने गणपतीपुळेकडे जाणार मार्ग बंद झाला होता.  मॉन्सूनचा आस बुधवारपर्यंत (ता. २४) दक्षिणेकडे सरकणार आहे. तर शुक्रवारपर्यंत (ता. २६) बंगालच्या उपसागरात उत्तर भागात हवेचे कमी दाबाचे क्षेत्र तयार होण्याचे संकेत आहेत. यामुळे राज्यात पावसाला पोषक हवामान होऊन, गुरुवारपासून (ता. २५) पाऊस वाढणार आहे. अरबी समुद्रात किनाऱ्यालगत ढगांची दाटी झाली असून, कोकण, मध्य महाराष्ट्रात अनेक ठिकाणी जोरदार पावसाची शक्यता आहे. तर मराठवाडा आणि विदर्भातही पाऊस पडण्याची अंदाज हवामान विभागाने वर्तविला आहे.  मंगळवारी (ता. २३) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस, मिलिमीटरमध्ये (स्रोत - हवामान विभाग) : कोकण : रत्नागिरी २८०, राजापूर २५०, दोडमार्ग १४०, लांजा, गुहागर प्रत्येकी १२०, कणकवली, देवगड प्रत्येकी ९०, हर्णे ८०, सावंतवाडी, वैभववाडी प्रत्येकी ७०, मुरूड, संगमेश्वर, अलिबाग प्रत्येकी ५०, कुडाळ, तळा, मालवण, माणगाव, वेंगुर्ला प्रत्येकी ३०.  मध्य महाराष्ट्र : गगणबावडा ८०, खंडाळा ६०, जत, अकोले प्रत्येकी ३०, हर्सुल, चंदगड, जवळीमेढा, सातारा, पन्हाळा प्रत्येकी २०.