कोकण, विदर्भात पावसाची शक्यता

पुणे : तापमानात झालेली वाढ आणि ढगाळ हवामान यांमुळे उकाड्यात वाढ झाली आहे. तर विदर्भात काही ठिकाणी जोरदार, तर कोकणसह उर्वरित राज्यात तुरळक ठिकाणी मध्यम ते हलक्या स्वरूपाचा पाऊस पडला. पूर्व विदर्भातील अहेरी (जि. गडचिरोली) येथे सर्वाधिक १०० मिलिमीटर पावसाची नोंद झाली. तर मुलचेरा, गोंडपिंपरी प्रत्येकी ८० मिलिमीटर पाऊस पडल्याचे हवामान विभागातर्फे सांगण्यात आले. आज (ता. २४) कोकण, विदर्भात अनेक ठिकाणी, तर उर्वरित राज्यात तुरळक ठिकाणी पावसाची शक्यता हवामान विभागाने वर्तविली आहे.     मध्य भारतातील उत्तर प्रदेश आणि बिहारमध्ये असलेले कमी दाबाचे क्षेत्र निवळले आहे. मॉन्सूनचा आस असलेल्या कमी दाबाच्या पट्ट्याचा (मॉन्सून ट्रफ) पश्चिमेकडील भाग हिमालयाच्या पायथ्याकडे सरकलेल्या स्थितीत कायम आहे. बंगालच्या उपसागरात चक्राकार वाऱ्याची स्थिती असून, सोमवारपर्यंत या भागात कमी दाबाचे क्षेत्र तयार होण्याचे संकेत आहेत. परिणामी, मध्य आणि पूर्व भारतात पाऊस सक्रीय राहणार आहे. राज्याच्या तापमानातही चढ-उतार सुरू असून, शुक्रवारी सकाळपर्यंतच्या २४ तासांमध्ये सोलापूर येथे ३४.६ अंश सेल्सिअस तापमानाची नोंद झाली.      शुक्रवारी (ता. २३) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस, मिलिमीटरमध्ये (स्रोत - हवामान विभाग) : कोकण : दापोली ४०, रोहा, गुहागर, पालादपूर प्रत्येकी ३०, संगमेश्वर, भिरा, रत्नागिरी, जव्हार, अंबरनाथ, कल्याण, माथेरान, पेण, वैभववाडी, खेड, मुरूड, मोखेडा प्रत्येकी २०.  मध्य महाराष्ट्र : महाबळेश्वर ३०, ओझरखेडा, गिरणाधरण, लोणावळा, शाहूवाडी, शिरोळ प्रत्येकी २०, जत, रावेर, जळगाव प्रत्येकी १०.  मराठवाडा : लातूर ४०, देवणी ३०, उमरगा, औसा, पातूर प्रत्येकी २०, रेणापूर, शिरूर अनंतपाळ, निलंगा, माजलगाव, नांदेड, बदनापूर, आंबड, खुल्ताबाद, कळंब, उस्मानाबाद प्रत्येकी १०.  विदर्भ : अहेरी १००, मुलचेरा, गोंडपिंपरी प्रत्येकी ८०, सिरोंचा ७०, चामोर्शी, मुल प्रत्येकी ६०, मोहाडी, राजुरा प्रत्येकी ५०, एटापल्ली, बल्लारपूर, चिमुर प्रत्येकी ४०, भंडारा, मौदा, चंद्रपूर, तुमसर, सिंदेवाही, साकोली, भद्रावती प्रत्येकी ३०, जेवती, रामटेक, सावळी, लाखनी, पारशिवणी प्रत्येकी २०.  घाटमाथा : दावडी, डुंगरवाडी प्रत्येकी ४०, ताम्हिणी, कोयना, पोफळी प्रत्येकी ३०.