मध्य महाराष्ट्र, मराठवाड्यात हलक्या पावसाची शक्यता 

पुणे ः राज्यातील पावसाचा जोर कमी झाला आहे. पुढील काही दिवस पावसाची उघडीप राहणार आहे. आज (ता.२५) खानदेशातील धुळे, नंदुरबार, जळगाव, मध्य महाराष्ट्रातील नाशिक, नगर, सांगली, सोलापूर मराठवाड्यातील औरंगाबाद, बीड, जालना, लातूर, उस्मानाबाद, हिंगोली, नांदेड, परभणी जिल्ह्यांत ठिकठिकाणी तुरळक ठिकाणी विजांच्या कडकडाटासह हलका ते मध्यम पाऊस पडण्याचा अंदाज हवामान विभागाच्या सूत्रांनी वर्तविला. 

गेल्या पाच ते सहा दिवसांपूर्वी महाराष्ट्राच्या उत्तर किनारपट्टी परिसरात असलेले चक्रवाताची स्थिती विरून गेली आहे. त्यामुळे राज्यातील पावसाचे तीव्रता कमी झाली आहे. मात्र, मध्य महाराष्ट्र उत्तर भाग व परिसर आणि उत्तर प्रदेशचा पूर्व भागात कमी दाबाचे क्षेत्र असून काही भागात चक्रवाताची स्थिती आहे. त्यामुळे पुढील काही दिवस ढगाळ हवामानासह कडक ऊन पडेल. तर तुरळक ठिकाणी हलक्या स्वरूपाच्या सरी बरसतील. आज कोकणातील सर्व जिल्हे, पुणे, कोल्हापूर, सातारा व विदर्भातील सर्व जिल्ह्यांत हलक्या काही ठिकाणी हलक्या पावसाचा शिडकावा होईल. 

राज्यात उद्या (ता.२६) नांदेड, लातूर, उस्नानाबाद तुरळक ठिकाणी मेघगर्जनेसह हलका ते मध्यम पाऊस पडेल. तर कोकण, मध्य महाराष्ट्र व विदर्भात तुरळक सरी पडतील. रविवारपासून (ता.२७) राज्यातील काही भागात काही अंशी ढगाळ राहणार असून अनेक भागात ऊन पडेल. त्यामुळे काही प्रमाणात उकाड्यात वाढ होऊन कमाल तापमानात वाढ होण्याची शक्यता आहे. पुणे परिसरातही ढगाळ हवामानासह अधूनमधून ऊन पडणार असून तुरळक सरी पडतील. तर घाटमाथ्यावरही हलका पाऊस पडण्याची शक्यता आहे.