तुरळक ठिकाणी पावसाची शक्यता

पुणे ः अरबी समुद्रात कमी तीव्रता असलेले क्यार चक्रीवादळ आणि लगत असलेले महा चक्राकार वाऱ्यांचा परिणाम राज्यातील हवामानावर होत आहे. यामुळे राज्यात आज (ता. १) आणि उद्या (ता. २) राज्यात तुरळक ठिकाणी जोरदार पाऊस पडणार असल्याचा अंदाज हवामान विभागाच्या सूत्रांनी वर्तविला आहे. गेल्या चार ते पाच दिवसांपासून लक्षद्वीपच्या परिसरात महा नावाचे चक्रीवादळ तयार झाले आहे. हे चक्रीवादळ अरबी समुद्राच्या आग्नेय दिशेकडे असले तरी ते अरबी समुद्राच्या दिशेने सरकत आहे. या चक्रीवादळाचा वेळ ताशी १७ किलोमीटर एवढा असून त्याची तीव्रता वाढणार आहे. हे चक्रीवादळ अमिनीदिवीपासून नैर्ऋ्त्याककडे ४० किलोमीटर, तर मिनीकायपासून ३५० किलोमीटर, कावारत्तीपासून ११० किलोमीटर तर केरळमधील कोझीकोडपासून ३२५ किलोमीटर अंतरावर आहे. तर अरबी समुद्रात असलेल्या क्यार चक्रीवादळाचीही तीव्रता कमी झाली असून, ताशी वेग १३ किलोमीटर एवढा आहे. त्यामुळे राज्यातील वातावरणात वेगाने बदल होत आहेत.   सध्या सकाळी काही प्रमाणात ढगाळ हवामान असले तरी नऊ दहा वाजेनंतर उन्हाचा चटका वाढत आहे. दुपारी कमाल तापमानाचा पारा चांगलाच वाढत आहे. दुपारनंतर अचानक वातावरणात बदल होऊन सायंकाळी ढग जमा होऊन पाऊस पडत आहे. मात्र, दुपारी उन्हाच्या वाढलेल्या तापमानामुळे कमाल तापमानाची चांगलीच वाढ होत आहे. गुरुवारी (ता. ३१) सकाळी आठ वाजेपर्यंतच्या चोवीस तासांत मुंबईजवळील सांताक्रुझ येथे सर्वाधिक ३६.४ अंश सेल्सिअस एवढ्या कमाल तापमानाची नोंद झाली आहे. बुधवारी (ता. ३०) सायंकाळी बीडमधील शिरूर कासार, पाटोदा, बीड नगरमधील पाथर्डी, नाशिकमधील दिंडोरी, नाशिक, पुणे जिल्ह्यांतील मावळ, मुळशी, भोर, वेल्हा, बारामती, शिरूर, हवेली, दौड, इंदापूर, खेड या तालुक्यांतील बहुतांशी भागात झालेल्या पावसामुळे भात, सोयाबीन, बाजरी, कपाशी पिकांचे काही प्रमाणात नुकसान झाले. गुरुवारी (ता. ३१) सकाळी आठ वाजेपर्यंत विविध ठिकाणचे कमाल तापमान, कंसात सरासरीच्या तुलनेत झालेली वाढ, घट (अंश सेल्सिअसमध्ये) : पुणे ३०.८ (-०.३), लोहगाव ३१.० (-१.०), जळगाव ३२.४ (-१.६), कोल्हापूर ३०.५ (-०.४), महाबळेश्वर २४.१ (-१.४), मालेगाव ३०.२ (-२.५), नाशिक ३०.५ (-१.२), सांगली ३१.५  (-०.२), सातारा ३०.०, सोलापूर ३१.७ (-०.३), मुंबई ३५.२ (१.४), सांताक्रुझ ३६.४ (२.२), अलिबाग ३३.४ (०.२), रत्नागिरी ३५.३ (२.०), डहाणू ३४.२ (०.९), औरंगाबाद २९.८ (-१.२), परभणी ३१.५ (०.१), नांदेड ३२.० (-०.५), अकोला ३२.९ (०.३), अमरावती ३१.४ (-१.०), बुलढाणा ३०.५ (०.८), ब्रम्हपुरी ३४.२ (२.९), चंद्रपूर ३२.६ (०.८), गोंदिया ३२.० (०.५), नागपूर ३३.२ (१.६), वर्धा ३२.२ (०.७), यवतमाळ ३२.५ (१.९)