पुणे ः बंगालच्या उपसागराच्या आग्नेय व नैऋत्य भागात चक्रिय वाऱ्यांची स्थिती आहे. त्याची तीव्रता आज (ता.२४) आणखी वाढणार असून वारे वायव्येच्या दिशेकडे असलेल्या तमिळनाडू व पॉंडेचेरी, कारीकल आणि ममल्लापुरम या भागाकडे सरकणार आहे. त्याचा परिणाम मध्य महाराष्ट्र, मराठवाडा व विदर्भातील काही भागांवर होणार आहे. यामुळे या भागात उद्यापासून (ता.२५) तुरळक ठिकाणी विजांच्या कडकडाटासह हलका पाऊस पडणार असल्याचे हवामान विभागाच्या सूत्रांनी सांगितले.

उत्तर भारतात असलेल्या थंडीच्या लाटेचा परिणाम राज्यातील वातावरणावर होऊ लागला आहे. राज्यात हवामान कोरडे असल्याने काही प्रमाणात थंडी वाढण्यास सुरूवात झाली असली तरी काही भागात अजूनही चढउतार सुरू आहेत. विदर्भाच्या पूर्व भागात थंडीने पुन्हा जम बसविला आहे. किमान तापमानात चांगलीच घट झाली आहे. सोमवारी (ता.२३) सकाळी आठ वाजेपर्यंत गोंदिया येथे १०.८ अंश सेल्सिअसची सर्वांत कमी किमान तापमानाची नोंद झाली.  

विदर्भापाठोपाठ कोकण, मध्य महाराष्ट्र व मराठवाड्यातही हवामान कोरडे असल्याने काही प्रमाणात गारठा वाढला आहे. सकाळपासून ऊन असल्याने काही ठिकाणी उकाडा वाढत आहे. त्यामुळे कमाल तापमानात किंचित वाढ होत असली तरी पहाटे वाढत असलेल्या गारठ्यामुळे किमान तापमानात घट होत आहे.
विदर्भातील किमान तापमानात सरासरीच्या तुलनेत पाच अंश सेल्सिअसपर्यंत घट झाली आहे.

अमरावती, गोंदिया, वर्धा येथील किमान तापमानात घट होऊन चांगलाच गारठा वाढला आहे. तर यवतमाळ, बुलडाणा, अकोला, नागपूर या भागातही किमान तापमान सरासरीएवढे आहे. मराठवाडा, मध्य महाराष्ट्र व कोकणातही किमान तापमानात किंचित घट झाली असून हळूहळू गारठा वाढू लागला आहे.

सोमवारी (ता.२३) सकाळपर्यंत विविध शहरातील किमान तापमान, कंसात वाढ, घट झालेले तापमान. (अंश सेल्सिअस). मुंबई (सांताक्रुझ) २०.०, अलिबाग २०.८ (१), ठाणे २४.२, रत्नागिरी २३.२ (२), डहाणू १९.१(-१), पुणे १९.३ (५), जळगाव १८.० (५), कोल्हापूर १९.५ (३), महाबळेश्वर १६.४ (२), मालेगाव १६.६ (३), नाशिक १५.० (३), निफाड १५.४, सांगली १९.१ (३), सातारा १८.५ (३), सोलापूर २०.६ (४), औरंगाबाद १७.४ (४), परभणी १६.४ (२), परभणी कृषी विद्यापीठ १५.८, नांदेड २१.० (७), उस्मानाबाद १९.० (५), अकोला १६.१ (१), अमरावती १३.३ (-३), बुलडाणा १६.५, चंद्रपूर १६.४ (१), गोंदिया १०.८ (-५), नागपूर १३.८, वर्धा १४.४ (-१), यवतमाळ १५.५

येथे होणार पाऊस 
बुधवार ः भंडारा, चंद्रपूर, गडचिरोली, गोंदिया. 
गुरुवार ः सांगली, सोलापूर, हिंगोली, नांदेड, लातूर, उस्मानाबाद, अकोला, अमरावती, भंडारा, चंद्रपूर, गडचिरोली, गोंदिया, नागपूर, वर्धा, वाशीम, यवतमाळ.  
शुक्रवार ः सांगली, सातारा, सोलापूर, औरंगाबाद, लातूर, उस्मानाबाद, भंडारा, चंद्रपूर, गडचिरोली, गोंदिया, यवतमाळ.