कोकणात काही ठिकाणी मुसळधार 

पुणे : कोकणात तुरळक ठिकाणी मध्यम स्वरूपाचा पाऊस पडत आहे. अनेक ठिकाणी हलका पाऊस पडला. मध्य महाराष्ट्र, मराठवाडा व विदर्भात पाऊस नसल्याने शेतातील ओल कमी होऊ लागली आहे. त्यामुळे शेतीकामे वेगाने सुरू झाली आहेत. 

कोकणातील अनेक भागांत पावसाचा जोर कमी झाला असला, तरी काही ठिकाणी पावसाचा जोर वाढला आहे. सिंधुदुर्ग जिल्ह्यात पावसाचा जोर काहीसा वाढला आहे. रायगड, रत्नागिरी जिल्ह्यांच्या अनेक भागांत पावसाच्या सरीवर सरी पडत आहे. मध्य महाराष्ट्रातही पुणे, सातारा, कोल्हापूर, नाशिक जिल्ह्यांच्या पश्‍चिम भागात अधूनमधून तुरळक सरी बरसत आहेत. अधूनमधून ऊन पडत असल्याने दिलासा मिळत असला, तरी तुरळक पावसाने भात पिकांची वाढ जोमदारपणे सुरू आहे. पूर्व भागात पाऊस नसल्याने शेतकरी पावसाच्या प्रतीक्षेत आहेत. 

खानदेशातील धुळे, नंदुरबार, जळगाव भागांत ऊन पडल्याने पिकांना पाण्याची गरज भासत आहे. मराठवाड्यात पिके वाढीच्या अवस्थेत आहेत. पावसाने चांगलीच उघडीप दिल्याने शेतात मजुरांची लगबग सुरू आहे. 

मंगळवारी (ता.३) सकाळी आठ वाजेपर्यंत धरणक्षेत्रनिहाय झालेला पाऊस (मिलिमीटरमध्ये)  भातसा २१, सूर्या धामणी १३, वैतरणा २२, इटियाडोह ५, इरई १०, बेंबळा ५, अरुणावती ६, वान ८, पेनटाकळी ६, गंगापूर २०, भंडारदरा ४३, डिंभे ८, पानशेत १९, वरसगाव २०, पवना ३७, नीरा देवघर १६, भाटघर ६, धोम, कण्हेर ५, धोम बलकवडी २१, वारणा २२, दूधगंगा २४, राधानगरी ६०, कोयना २५.  मध्यम पावसाची शक्यता  आज (ता.४) कोकणात सर्वदूर हलक्या ते मध्यम पावसाची शक्यता आहे. उर्वरित राज्यात तुरळक ठिकाणी हलक्या सरींसह, मुख्यतः पावसाची उघडीप राहण्याचा अंदाज हवामान विभागाने वर्तविला आहे. उद्या (ता. ५) महाराष्ट्रातील कोकणात सर्वदूर हलक्या ते मध्यम पावसाचा अंदाज आहे. पावसाला पोषक हवामान नसल्याने विदर्भ, मध्य महाराष्ट्र, मराठवाड्यात तुरळक ठिकाणी हलक्या सरींसह पावसाची उघडीप राहण्याचा अंदाज हवामान विभागाने वर्तविला आहे.  येथे होणार जोरदार पाऊस  बुधवार ः रायगड, रत्नागिरी, सिंधुदुर्ग, पुणे, सातारा, संपूर्ण राज्यात तुरळक  गुरुवार ः रायगड, रत्नागिरी, संपूर्ण राज्यात तुरळक  शुक्रवार ः संपूर्ण राज्यात तुरळक  शनिवार ः संपूर्ण राज्यात तुरळक