राज्यावर पूर्वमासेमी पावसाचे सावट 

राज्यात पूर्वमोसमी पावसाने हजेरी लावली आहे. आज (ता.१) व उद्या (ता.२) पावसाचे सावट कायम राहणार आहे. जोरदार वारे, मेघगर्जना, विजांसह वादळी पाऊस पडण्याची शक्यता आहे.
Hawaman
Hawaman

पुणे: राज्यात पूर्वमोसमी पावसाने हजेरी लावली आहे. आज (ता.१) व उद्या (ता.२) पावसाचे सावट कायम राहणार आहे. जोरदार वारे, मेघगर्जना, विजांसह वादळी पाऊस पडण्याची शक्यता आहे. तर रविवारपासून (ता. ३) राज्याच्या बहुतांशी भागात ढगाळ आकाशासह हवामान मुख्यत: कोरडे राहण्याचा अंदाज आहे. राज्यात उन्हाचा चटका वाढण्याची शक्यताही हवामान विभागाने वर्तविली आहे. गुरूवारी (ता.३०) सकाळपर्यंतच्या २४ तासांमध्ये जळगाव व धुळे येथे ४३ अंश सेल्सिअस तापमानाची नोंद झाली.  राजस्थानपासून मध्य प्रदेश, मध्य महाराष्ट्र, कर्नाटक, तामिळनाडूपर्यंत हवेचा कमी दाबाचा पट्टा विस्तारला आहे. समुद्रावरून होणाऱ्या बाष्पाच्या पुरवठ्यामुळे राज्यात ढगांची निर्मिती होऊन वादळी वाऱ्यासह पाऊस पडत आहे. आज (ता.१) कोकण, मध्य महाराष्ट्र, मराठवाडा आणि विदर्भात पूर्वमोसमी पावसाची शक्यता आहे. कोकणातील रायगड, रत्नागिरी, सिंधुदुर्ग, मध्य महाराष्ट्रातील पुणे, नगर, मराठवाड्यातील उस्मानाबाद, लातूर, नांदेड, विदर्भातील नागपूर, गोंदिया, भंडारा, गडचिरोली, चंद्रपूर जिल्ह्यात वादळी पावसाचा इशारा देण्यात आला आहे.  दरम्यान उन्हाचा चटकाही चांगलाच वाढला असून धुळे, जळगावसह मालेगाव, निफाड, सोलापूर, परभणी, नांदेड, अकोला, अमरावती, बुलडाणा, ब्रह्मपुरी, चंद्रपूर, नागपूर, वाशिम आणि वर्धा येथे तापामान चाळीशीपार गेले आहे. राज्यात कमाल तापमानाचा पारा चढताच राहणार असल्याचे हवामान विभागाने म्हटले आहे. 

गुरूवारी (ता. ३०) सकाळपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३९.८, जळगाव ४३.०, धुळे ४३.०, कोल्हापूर ३६.२, महाबळेश्‍वर ३०.०, मालेगाव ४२.२, नाशिक ३९.२, निफाड ४०.०, सांगली ३६.९, सोलापूर ४०.८, डहाणू ३४.८, सांताक्रूझ ३४.३, रत्नागिरी ३४.०, औरंगाबाद ३९.०, परभणी ४१.७, नांदेड ४०.०, अकोला ४२.६, अमरावती ४०.८, बुलडाणा ४०.४, ब्रह्मपुरी ४०.५, चंद्रपूर ४१.०, गोंदिया ३८.५, नागपूर ४०.१, वाशीम ४२.०, वर्धा ४०.०.  बंगालच्या उपसागरात कमी दाब क्षेत्र  बंगालच्या उपसागराच्या दक्षिण भागात आज (ता.१) सकाळपर्यंत कमी दाबाचे क्षेत्र तयार होणार आहे. दक्षिण अंदमान समुद्र, आणि लगतच्या हिंद महासागरामध्ये ढगांची दाटी झाली आहे. आजपासून अंदमान निकोबार बेटसमुहावर जोरदार पावसाचा इशारा देण्यात आला आहे. उपसागरात चक्रीवादळाचे संकेत असून, ते बांग्लादेश, म्यानमारकडे सरकण्याचा अंदाज वर्तविण्यात आला आहे. समुद्रात ताशी ५० ते ७० किलोमीटर वेगाने वारे वाहून, समुद्र खवळणार असल्याने मासेमारीसाठी खोल समुद्रात न जाण्याचा इशारा देण्यात आला आहे. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com