वाशीम जिल्हा परिषदेतील रिक्त पदे भरावी

वाशीम ः जिल्हा परिषदेच्या विविध विभागातील वर्ग एक व वर्ग दोनच्या अधिकाऱ्यांची पदे बऱ्याच वर्षांपासून रिक्त आहेत. याचा कामकाजावर परिणाम होत आहे. इतर कर्मचाऱ्यांवर कामाचा ताण वाढला असून नागरिकांची कामे खोळंबली आहेत. विकासकामांनाही खीळ बसली. ही सर्व पदे एक महिन्याच्या आत भरावी, अन्यथा ५२ सदस्यांसह उपोषणाला बसू असा इशारा वाशीम जिल्हा परिषद अध्यक्ष चंद्रकांत ठाकरे यांनी दिला आहे. याबाबत त्यांनी राज्याच्या मुख्य सचिवांना निवेदन दिले आहे.

याबाबत ठाकरे यांनी म्हटले की, ग्रामीण भागातील जनतेच्या विकासासाठी जनकल्याणाची कामे जिल्हा परिषदेच्या माध्यमातून केली जातात. जिल्ह्याचे मिनी मंत्रालय म्हणून जिल्हा परिषदेकडे बघितले जाते. परंतु येथील जिल्हा परिषदेमध्ये मुख्य कार्यकारी अधिकारी, जिल्हा ग्रामीण विकास प्रकल्प संचालक, उपमुख्य कार्यकारी अधिकारी (सामान्य प्रशासन), उपमुख्य कार्यकारी अधिकारी (पंचायत), वित्त विभागातील मुख्य लेखा व वित्त अधिकारी, लेखा अधिकारी, सार्वजनिक बांधकाम विभागातील कार्यकारी अभियंता, उपअभियंता, कार्यकारी अभियंता, उपअभियंता, ग्रामीण पाणी पुरवठा विभागातील कार्यकारी अभियंता, उपअभियंता, उपअभियंता यांत्रिकी, सहायक भुवैज्ञानिक, कनिष्ठ भुवैज्ञानिक, जलसंधारण विभागातील जिल्हा जलसंधारण अधिकारी, उपजिल्हा जलसंधारण अधिकारी, चार उपविभागीय जलसंधारण अधिकारी, आरोग्य विभागातील वर्ग एकची ७ पदे रिक्त आहेत.

कृषी विभागातील वर्ग दोनची २ पदे रिक्त आहेत. पशुसंवर्धन विभागातील वर्ग दोनची ८ पदे रिक्त आहेत. शालेय शिक्षण विभाग प्राथमिक येथे वर्ग दोनची १४ पदे रिक्त आहेत. समाजकल्याण विभागातील वर्ग एकची २ पदे आहेत. जिल्ह्यात एकूण वर्ग एक व वर्ग दोनची ६४ पदे रिक्त आहेत. यामुळे कामकाज प्रभावित झाले आहे. जिल्ह्यात पंचायत समिती स्तरावर वाशीम, मानोरा, रिसोड, मालेगाव, मंगरुळपीर येथील गटविकास अधिकारी वर्ग एकची ५ पदे रिक्त आहेत.