विदर्भ, मराठवाड्यात पावसाचा अंदाज

पुणे : पाऊस थांबल्याने राज्याच्या अनेक भागांतील तापमान आणि उकाड्यात चांगलीच वाढ झाली आहे. मध्य भारतातील कमी दाब क्षेत्रामुळे विदर्भ, मराठवाड्यात आज (ता. २१) पावसाचा अंदाज आहे. मराठवाड्यात जोराच्या सरी येण्याची शक्यता आहे. तर कोकणातही काही ठिकाणी आणि मध्य महाराष्ट्रात तुरळक ठिकाणी पाऊस पडण्याचा अंदाज हवामान विभागाने वर्तविला आहे. 

मध्य भारतातील उत्तर प्रदेश आणि झारखंड राज्यात हवेचे कमी दाब क्षेत्र सक्रीय आहे. तर मॉन्सूनचा आस असलेल्या कमी दाबाच्या पट्ट्याचा (मॉन्सून ट्रफ) पश्चिमेकडील भाग हिमालयाच्या पायथ्याकडे सरकला असल्याने कोकण, मध्य महाराष्ट्रातही पाऊस थांबला आहे. तर मॉन्सून ट्रफचा पूर्व भाग कमी दाब क्षेत्राच्या केंद्रातून जात आहे. परिणामी, उत्तर आणि पूर्व भारतातील राज्यात पाऊस सुरू आहे. आज (ता. २१) विदर्भ आणि मराठवाड्यातही पावसाला पोषक हवामान आहे. 

पावसाच्या उघडपीमुळे राज्यात अनेक ठिकाणी तापमान ३० अंशांच्या पुढे गले आहे. मंगळवारी (ता. २०) सकाळपर्यंतच्या २४ तासांमध्ये मध्य महाराष्ट्रातील सोलापूर येथे सर्वाधिक ३४.९ अंश सेल्सिअस तापमानाची नोंद झाली. मध्य महाराष्ट्रातील तापमान २० ते ३५ अंशांच्या दरम्यान आहे. तर कोकणात ३० ते ३३ अंश, मराठवाड्यात २९ ते ३४ अंश आणि विदर्भात २९ ते ३४ अंशांच्या आसपास आहे. 

मंगळवारी (ता. २०) सकाळी साडेआठ वाजेपर्यंतच्या २४ तासांत राज्यातील विविध ठिकाणचे कमाल तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे ३०.६ (२.९), जळगाव ३२.०(१.०), कोल्हापूर २९.८(२.८), महाबळेश्वर २०.६ (०.९), मालेगाव ३२.४ (२.२), नाशिक २९.० (१.०), सांगली ३०.६ (१.७), सातारा २९.६ (३.१), सोलापूर ३४.९ (३.६), अलिबाग ३२.७ (३.१), डहाणू ३१.३ (१.१), सांताक्रूझ ३१.२ (१.३), रत्नागिरी ३०.२ (१.४), औरंगाबाद ३२.२ (३.०), बीड ३४.३ (४.१), परभणी ३४.० (३.३), नांदेड २९.० (-२.४), उस्मानाबाद ३२.२ (३.०), अकोला ३२.६ (२.०), अमरावती ३०.४ (०.२), बुलडाणा २९.४ (२.१), ब्रह्मपुरी ३३.१ (२.८), चंद्रपूर ३२.४(१.६), गोंदिया ३१.५(१.०), नागपूर ३३.८ (३.३), वर्धा ३३.० (२.८), यवतमाळ ३०.५(१.३).   

मंगळवारी (ता. २०) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस, मिलिमीटरमध्ये (स्रोत - हवामान विभाग) :

कोकण : सावंतवाडी ३०, मोखेडा २०, विक्रमगड, जव्हार, शहापूर, भिरा प्रत्येकी १०. 

मध्य महाराष्ट्र : गिरणा धरण ३०, भुसावळ, यावल प्रत्येकी २०, ओझरखेडा, रावेर, मुक्ताईनगर, इगतपुरी, बोधवड प्रत्येकी १०. मराठवाडा :  निलंगा, वाशी प्रत्येकी १०. 

विदर्भ : लाखणी ५०, भिवापूर, नागपूर प्रत्येकी ४०, सिंदेवाही, उमरेड, आष्टी, चिमूर, सेलू प्रत्येकी ३०, गोंदिया, बल्लारपूर, मौदा, भंडारा, कळमेश्वर,आर्वी, खारंघा, हिमायतनगर, साकोली, समुद्रपूर प्रत्येकी २०.   घाटमाथा : दवडी ३०, आंबोणे २०, शिरगाव, ताम्हिणी, लोणावळा, ठाकूरवाडी, डुंगरवाडी, भिरा प्रत्येकी १०.