पुणे जिल्ह्यात पावसाच्या सर्वदूर सरी

पुणे : जिल्ह्यात गेल्या आठवडाभरापासून जिल्ह्यात सर्वदूर पावसाने हजेरी लावली आहे. पश्चिम भागात पावसाचा जोर कायम असून, पूर्व भागात मात्र हलक्या ते मध्यम सरी येत आहेत. जवळपास आठवडाभर असलेल्या ढगाळ हवामानामुळे जिल्ह्याच्या अनेक भागांत सूर्यदर्शन झाले नाही. मावळ भागात भातखाचरे ओसंडून वाहत आहेत. पेरणी झालेल्या भागात पिके वाढीच्या अवस्थेत आहेत. पावसाने उघडीप न दिल्याने काही भागात पेरण्या व शेतीची कामे खोळंबली आहेत. 

बुधवारी (ता.३१) सकाळपर्यंतच्या २४ तासांमध्ये मुळशी, भोर, मावळ, वेल्हा व जुन्नर तालुक्यात काही ठिकाणी अतिवृष्टी झाली. लोणावळा येथे सर्वाधिक १४४ मिलिमीटर पाऊस पडला. तर खेड, आंबेगाव तालुक्यात पावसाचा जोर काहीसा कमी होता. हवेलीसह पूर्व भागातील शिरूर, बारामती, दौंड, इंदापूर, पुरंदर तालुक्यात सातत्याने हलक्या ते मध्यम सरी येत राहिल्या.  

धरणातून विसर्ग सुरूच

धरण क्षेत्रात पडत असलेल्या पावसाने अनेक धरणांमध्ये ७० टक्क्यांपेक्षा अधिक पाणीसाठा झाला आहे. ‘ओव्हर फ्लो’ झाल्याने अनेक धरणांमधून विसर्ग सुरूच आहे. भीमा नदीच्या पाण्यामुळे उजनीच्या पाणीपातळीत वेगाने वाढ होत आहे. बुधवारी जिल्ह्यातील वीर, खडकवासला, कासारसाई, आंद्रा, चासकमान, कलमोडी, वडज, येडगाव या धरणातून पाण्याचा विसर्ग सुरूच आहे. खडकवासला धरणातून सुमारे ९ हजारहून अधिक, तर वीर धरणातून १४ हजार क्युसेक वेगाने पाण्याचा विसर्ग होत आहे. 

मंडळनिहाय पाऊस (मिमी) स्रोत : महसूल विभाग)